話說，繼早前有日本網民教大家用威士忌浸士多啤梨酒後，最近又有另一位日本網民喺twitter出post教大家浸酒，仲話等一個星期就有得飲?！事不宜遲，即刻跟呢位網民學下嘢先！

今次呢位網民浸嘅係雜莓酒，除咗有士多啤梨之外，仲加埋紅莓同藍莓。而酒呢⋯⋯今次呢位網民就唔用威士忌，改為用比較多人用嚟浸酒嘅伏特加。嗱，伏特加甜度冇咁高，用嚟浸雜莓酒咪啱晒囉！

做法就係咁樣樣嘅：

首先，將啲雜莓放入玻璃罐，大約9成滿就ok；然後加入伏特加，同樣都係加到9成滿就停，留返10%空間畀個罐；跟住，隨個人口味加適量砂糖；最後，將個玻璃罐放入雪櫃雪一個星期，咁就大功告成㗎喇！（重要提示：雜莓一定要印乾水先好拎去浸酒呀！）

到咗飲嘅時候，自己鍾意溝幾多炭酸水落去咪溝幾多囉～wow，爽呀！嗱，趁住今日星期五，一於收工嗰陣就去買材料，返去浸定等下個happy friday飲啦！（ps：預咗要ot嘅朋友仔可以無視呢句）

セブンのミックスベリー（冷凍）を瓶に詰めてウォッカで満たします。
1週間冷蔵庫に入れると色と香りと味が溶けて炭酸系で割ると綺麗＆美味しい。
甘いお酒が好きな人は、瓶詰め時に砂糖入れると超美味しくなることは想像に難くない。 pic.twitter.com/spHEOTuopp

— オンモラキ (@onmoraki_4649) 2017年5月16日

資料來源：onmoraki_4649／twitter

睇埋：【五日搞掂】用威士忌浸士多啤梨酒原來咁好飲！