上網買嘢就最怕中伏㗎喇，雖然話假貨比真貨好啫，但係最怕係件真貨本身就已經係個伏呀！所以好多人上網買嘢都係買平嘢，好似衫呀裙呀咁，貪佢有咩問題掉咗都唔覺肉赤吖嘛～

但總有啲勇者係都要打下大佬先安樂嘅，台灣有位網友，居然咁夠膽喺網上面買木雕喎！木雕都係一嚿木啫，最多咪變咗第二個款，應該唔會太伏嘅⋯⋯應該⋯⋯

點知網友一打開，睇到佢當堂嚇一跳，大佬，種菇包嚟嘅喂！

呃⋯⋯又真係幾似喎，仲要啲菇隻隻都咁大隻，賣家你唔係想話，啲菇係因為運貨途中條道路太濕滑，所以先會生出嚟呀？有冇咁快高長大呀！人哋要買嘅係木雕呀，你送咁大堆菇菇嚟，你當網友係過兒呀？

網友又唔使咁嬲嘅，從好嗰方面諗，以後打邊爐咪唔使去買菇囉～直接搣出嚟夠晒新鮮呀！話唔定啲菇菇係傳說中嘅白玉（肉）靈芝呢～況且而家嚿木都幾有藝術感吖，可能幫佢改個靚名，啲人就會出高價買呢，話晒藝術嘅嘢⋯⋯一於就叫《木上的菇兒》啦！肯肯定紅呀！

話口未完，網友Post咗上FB之後，又有媒體想採訪，又有人PM佢話想買喇！

其實木雕生菇都好呀，起碼都仲可以當藝術品咁sell吖嘛，點都好過喺啲打完丁嘅廁紙上面生菇嘅⋯⋯唔通真係放上網當種菇包賣咩⋯⋯

封面圖片及資料來源：張國偉、imgur、Utome