嘢食嚟講，最緊要嘅不外乎都係色香味啦，不過味道始終要畀錢買嚟食落先知，咁點樣吸引人買呢？咪就係靠賣相囉，如果唔係「色」又點會排第一呢！啲食物整晒得意動物造型，真係易啲呃到妹豬買㗎，經過見到，大嗌一聲「巧打耳呀～」就拎咗銀包出嚟喇，你話賣相係咪最重要先！

動物造型嘅甜品就見得多啦，大家都唔會以為係真動物而唔敢食嘅，不過最近泰國呢款沙皮狗啫喱就真係嚇到大家怕怕啵。啲假狗合埋眼趴喺個膠盒度，唔講都差啲以為係出世冇幾耐嘅狗BB呀，唔怪得咁多網民都話唔敢擺入口啦！

沙皮狗啫喱同真嘅狗狗一樣，有米色呀啡色呀等等嘅唔同深淺色，遠睇同原隻急凍乳豬仔嘅驚嚇程度真係有得揮……大佬呀，你整啲咩粉紅色粉藍色，咪唔使驚畀人誤會係真狗囉，而且可能仲得夢幻系妹豬歡心?呀！

所以話，呢個世界唔係乜都愈逼真愈好㗎，有時假假地先比真嘢好呀！你睇呢幾款動物蛋糕，咪又kawaii又唔會嚇親人囉！

毛毛終於明喇，原來個蛋糕師傅唔係功力未到家，而係特登整到Elsa冇咁像真，廢事啲細路女以為自己真係食咗Elsa落肚嘅！嗱，以後見到走呢個路線嘅甜品，就唔好話人揸流攤喇，知冇？

封面圖片、資料來源連結：วิไลวรรณ บ้านขนมไทย、kbooks_collabo／twitter、PTT

延伸閱讀：

【畀我抖下啦】 日本動物蛋糕款款可愛 唯獨狐狸變咗死魚眼？

【Let eat糕】師傅你肯定呢個真係Elsa？