做邊行最需要創作力量同幻想？藝術家？梗係唔係啦！毒梟先係最需要創意嘅行業呀～你諗下，要逃過警察同海關嘅法眼將一批批嘅毒品運出去喎，如果咁易畀你啲人估到仲得了嘅？

最衰冇電子丸仔或者電子白粉啦，如果唔係，只要不誠實咁使用下電腦，搞下VR上電咪搞掂囉！係呢個膠科技年代，用咩方法先最估唔到？咪臭係用啲更膠嘅科技囉！

下？說好的膠科技取居然係隻鴿！唉～復古呢家嘢，你識條鴿毛咩～潮流一向係重覆重覆又重覆㗎啦，喇叭褲鬆高鞋嗰啲都係咁啦。但係鴿仔細細，可以收喺邊呀？唔通⋯⋯哦！你虐畜！

傻啦，搵食架生嚟㗎嘛，跛姣哥又點會咁對佢啫，原來係幫隻鴿整咗個同佢哋啲羽毛差唔多色嘅背囊仔呀！仲容量特大，可以放成178粒丸咁多呀！真係好體貼呀，睇唔出毒梟都有咁賢淑嘅一面呀下～

不過天網恢恢，居然咁都畀科威特嘅海關關員喺天台度見到阿鴿，?仔鬼鬼祟祟，仲唔係想偷蕃薯！阿鴿咁就衰咗喇！

「阿sir，畀次機會吖咕⋯⋯我幫人帶嘢嫁咋，我唔知入面係咩嚟㗎咕咕⋯⋯」

算啦阿鴿，你今次斷到咁正，衰硬㗎喇。btw，呢位關員咁好摩擦力，咁遠都睇到阿鴿有唔妥嘅⋯⋯其實阿蛇本來係咪想食乳鴿，咁啱捉到阿鴿運毒咋？姣哥，叫咗你唔好用鴿㗎啦，會畀人食㗎嘛！

封面圖片及資料來源：Alwatan Kuwait​​、zidankkzidan​／twitter、sauds_ksa/twitter、Guy4mkuwait／imgur