早兩日天文台終於都捨得掛黑雨喇！弊在上午校同全日制嘅同學仔已經濕9晒咁返晒學校呢⋯⋯仲要Lun廚先嚟掛黑雨，真係多L謝晒呀。

有啲人就話Lun廚掛黑雨咪扮晒嘢返屋企食，乘機下畫唔返學囉～好心你咁大個人就唔好咁多幻想啦，唔好話返屋企食吖，學校分分鐘連學生出去食都唔畀呀！

有個自稱南屯門某官中學生嘅網友就Post咗水蛇春咁長嘅控訴上名校Secret，話因為學校嘅「超貼心」安排搞到高Form學生飯都冇得食呀⋯⋯

是咁的，原來學校唔想同學黑雨出去咁危險，所以落閘放狗呀，唔好話出去食lun廚，就連落小食部買都唔得呀！

學校仲要好叻豬咁搵咗兩間餐廳咁多嚟訂千幾個飯盒呀⋯⋯毛毛用超強嘅數學頭腦（即係計數機）分析過，兩間餐廳每間最少要整500幾個，得兩個半鐘時間，即係每分鐘起碼要整3個出嚟呀！仲快過淥杯麵喎！

於是咪搞到整唔切兼唔夠分囉⋯⋯不過唔怕嘅，而家啲妹豬咁細食，幾個人share一份咪得囉～

但係校長唔知係咪覺得低Form發育時期要食多啲，所以連share都慳返，直接畀晒啲飯盒低Form同學食，高Form同學餓到暈都仲要「被讓出」個飯盒，副校長仲要高調咁話係高Form同學「自願」㗎。

最後高Form同學淨係可以飲低Form唔要嘅汽水咋陰功。高Form同學，有汽水飲你哋就好知足啦，你哋都唔明白校長嘅苦心嘅，學校係社會嘅縮影吖嘛。而家有大把人都係咁㗎啦，畀人搶晒啲資源，仲要被代表話係自願㗎。學校都係想你哋快啲適應定呢個現實社會啫⋯⋯好似係。

封面圖片及資料來源：名校secret