【你唔愛我啦】以為發現女屍 原來係吹氣公仔畀人遺棄山邊

每段感情都有佢嘅保鮮期,係嘅,雖然一齊有好多快樂嘅時光,但關係完咗就完咗㗎喇,你明唔明呀?唔明呀!毛毛真係唔明,Mary陪伴咁多青春少男成長,點會有人忍心拋棄佢㗎!

早幾日喺雲南,有人喺樹林度發現一具女屍呀!是咁的,村民一清早天都未光晒,眼都未擘大就起身出門,行過樹林嗰陣,居然係垃圾堆隱隱約約發現一個衣衫不整女人瞓喺入面,真係嚇到鼻哥窿都冇肉呀!

圖片來源:雲南網

警察收到情報趕去現場之後,發現呢單係一宗「情殺案」呀!不過受害者唔係真人,係一個秀髪亂了嘅吹氣公仔啫。估計有人情變,唔再愛個吹氣公仔,咪掉佢去山邊樹林個垃圾堆度囉~

圖片來源:雲南網

古乳有暈,一夜夫妻百二蚊,唔知係咪上手主人掉嗰陣怕舊愛凍親,仲特登搵棉被包住佢𠻹,遠睇真係嚇死人㗎!嗚⋯⋯話晒都一齊咁耐啦,居然由得舊愛曝屍荒野,真係冇陰公呀……

人哋都跟咗你咁多年啦,冇功勞都有苦勞吖~吹氣公仔用厭咗都唔一定要掉嘅,仲可以有好多用途㗎嘛~

圖片來源:gyate7631/twitter

好似日本網民咁,掉個公仔落水,再改個名做「游泳的女人」。起碼都叫提升咗佢嘅層次,變咗做一件藝術品吖!不過都可能會畀人當錯係浮屍嘅⋯⋯

圖片來源:電影《4X100水著份子》截圖

讀者來圖:Alison Kwok

再唔係,其實呢位舊愛咁熟水性,點解唔租佢出去做愛的水泡呢?又或者叫佢做游水教練嘅助手,親身下海教毒L游水,話唔定佢仲會遇到下一段真愛,同對方編寫愛的經典呢!


封面圖片及資料來源:雲南網gyate7631/twitter、Alison Kwok、電影《4X100水著份子》截圖
 

經典重溫:

吹氣Mary可以點用?

【嚇到縮一縮】邊L個放隻浮屍咁嘅公仔喺個湖度呀!

毛記電視網站 · 版權所有 · 不得轉載 Copyright © TVMOST.COM.HK All rights reserved