【Emoji謎題】消失的歌手紅過嘅K歌你估得出幾多首？

2017年05月31日星期三

那些年喺K房出面總會聽到某幾個新人某幾首嗰期好hit嘅歌，但係過咗一排之後，呢班人就好似變咗失蹤人口咁。跟住佢地再出現嘅時候，可能已經再唔係歌手⋯⋯又或者，就算係歌手，都冇人記得佢哋其他歌。以下呢堆歌同人，你又估到同記得幾多個呢？

必答題

答案：你（梨）唔愛我（鵝）啦（喇）－李彩樺

「是但啦～算數啦～你唔愛我喇～」呢句歌詞當時個個都識唱，但係之後嘅歌詞就冇咩人會記得⋯⋯呢個當年以玉女形象出道嘅歌手，其實仲紅咗幾首歌嘅，《愛一個人原來不容易》同《分手勿語》呢啲當年都係K房熱播歌，不過佢好快就消失咗喇⋯⋯

再出返嚟，李彩樺變咗李彩華，仲上埋大陸發展?。近排再睇返佢啲相，嘩！真係忍唔住問你邊位呀？古乳有暈，往事只能回味，呢個時候，唯有上網打「李彩華小背心」，重溫下那些年嘅回憶啦。

答案：接（摺）受（壽）我（鵝）－蕭正楠

嗱嗱嗱，你實話佢未消失仲有唱歌㗎，不過人哋已經唔係歌手身份吖嘛。當年呢首歌可以話係MK仔溝女之歌，唱K對住女女唱，「你若接受我好嗎～即使我沒情話從沒鮮花～」，啲MK妹仲唔冧死？可惜一個???嘅廣告之後，世上再冇蕭正楠呢個歌手，只有???⋯⋯所以話，廣告嘅威力真係好強大⋯⋯

答案：說（雪）清（青）楚（坐）－小雪

又係消失的玉女歌手，那些年都唔知點解咁L多玉女歌手⋯⋯不過佢都屬於幾好丁嘅靚女嚟嘅。除咗呢首歌，同另一個失蹤人口漢洋唱嘅《其實我介意》當年都幾紅。嗰陣佢算畀人熱捧過嘅，仲喺大台同張達明、谷德昭拍過《FM701》，但係紅咗冇耐又喺香港樂壇消失咗，據講2016復出出過首歌，但係冇咩人知咁囉⋯⋯

答案：明知（芝）故（菇）犯（飯）－張燊悅（余文樂合唱）

呢首明明就係翻唱歌！但係因為當時後生嗰輩冇咁多人識許美靜，所以好多人都係聽呢個版本先搵返原唱聽⋯⋯不過佢唱歌似乎就唔太多人Buy，之後就主力拍戲多喇⋯⋯

Between，除咗打9張志明之外，毛毛都好耐冇聽過Fisherman Lok唱自己啲歌喇⋯⋯其實Fisherman Lok唱嘅兵歌絕對唔會少過大文豪㗎，《名牌》、《司機》、《護衛》⋯⋯真係兵，全部都係兵。

答案：兩種（中）人－何嘉莉

係咪冇咩印象呢，講埋「英皇三小花」另外兩個你就可能有印象㗎喇，係葉佩雯同容祖兒喎！唱埋副歌嗰句「痛著愛～笑著吻～你共我是兩種人～」，係咪即刻回憶返晒嚟呢？

如果冇聽過呢首，咁《BB保你大》有聽過啦啩～「Biba～Bibala～」嗰首喎～都係唔識？睇嚟毛毛唔小心曝露咗自己嘅年紀⋯⋯

答案：夜遊（游）杜（刀）拜－李籠怡

呢首歌真係睇到個歌名就已經有聲喇！又一個由Model轉唱歌再轉咗去拍戲嘅例子，唔知係咪大家睇厭晒玉女歌手，所以同屆開始多咗好多Sell性感嘅歌手，佢就係其中一個。另外一首姊妹K歌之選咪臭係地鐵廣告歌首《時光中飛舞》囉～嗱嗱嗱，畀定下題貼士你，知唔知同李蘢怡合唱呢首歌嗰個係邊個呀？

答案：順路－陳文媛

呢首充滿少女思春情懷嘅歌，想當年都不知有幾多少女喺個MSN同Xanga度打「別回家兜兜風再算」同埋「你待我好好友好～戀也戀不到」⋯⋯就算唔記得呢首歌，毛毛都會記住佢曾經做過TBB某套睇到大家O晒咀嘅游水劇⋯⋯

加碼抽象題

答案：絕（啜）－高雪嵐

高雪嵐呢個名係咪既熟悉又陌生呢？如果叫返傅珮嘉，係咪聽落熟啲呢？係呀，佢哋其實係同一個人嚟㗎。呢首歌真係歌如其名，絕到冇朋友，聽完真係生命冇希望，前路受重創呀。特別係OT緊嘅時候聽，真係好應景⋯⋯

消失咗好耐嘅佢，噚日竟然畀大台邀請咗上節目！但係毛毛喺餐廳度聽到隔籬枱食客問，呢個唔係車婉婉嚟㗎咩⋯⋯毛毛望一望電視，呃⋯⋯我睇唔透⋯⋯

外語歌名加分題

答案：I Believe(Bee) (Leaf) －葉文輝

因為一套《我的野蠻女友》而爆紅嘅歌。喺那些年仲要逐個音入鈴聲嘅時候，十個有九個人嘅鈴聲都係用呢首，你就知套戲個威力有幾大⋯⋯

其實人哋之後明明都仲有出歌㗎，但係個個聽到葉文輝或者啤梨呢個名，都淨係識得呢首歌囉⋯⋯

終極大佬題

答案：She Bangs(病）－William Hung

係佢喇！大家係咪好掛住佢呢？連亞洲神童章魚城都唔夠佢嚟呀！話晒人哋衝出國際，一首She Bangs轟動國際樂壇。咁強嘅歌手都不忘返嚟香港回饋香港樂壇，仲同家燕媽媽一齊拍戲大唱She Bangs改編版嘅燒餅歌?～首首歌都係膾炙人口嘅經典嚟㗎！