最近，美國新澤西州有隻鹿仔唔小心跌咗落坑渠。佢咁細隻，個坑渠又咁深，單憑鹿仔自己嘅力量根本就冇可能爬到出嚟。好在，呢隻鹿仔遇到一位好有愛心嘅警察Tim Majek，有咗呢位警察嘅幫助，鹿仔終於可以離開嗰個又臭又污糟嘅坑渠，返去自己原來嘅地方，同屋企人團聚喇！

起初呢隻鹿仔見到無啦啦有個麻甩佬跳落坑渠都好驚嘅，仲嚇到暴走兼係咁叫?，不過經Tim Majek抱起佢摸摸之後，隻鹿仔已經冇咁驚嚕～

大家睇下Tim Majek笑得幾開心～喂，成功救到一隻咁可愛嘅鹿仔喎，梗係有滿足感啦！

btw，其實呢位警察都唔係第一次救鹿㗎喇，今次呢隻咪係第三隻畀佢救返嘅鹿仔囉。雖然爬一爬落坑渠唔算得係啲咩大恩大德，但呢個咁簡單嘅動作就救返一條生命。多謝你呀，Tim Majek！

資料來源：Woodbridge Police Department