飛蟻大軍來襲 用咩方法先對付到佢哋?

又到咗一年一度飛蟻大軍來襲嘅季節喇!

眾所9知,台灣呢排暴雨連連,最近有台灣網民就話自己屋企已經畀一班飛蟻大軍侵襲,連用電蚊拍啪咗成粒鐘都未啪得死啲敵人喎!佢仲話,自己唔係前世未見過飛蟻,以往都有唔少對付飛蟻嘅經驗,只不過好似今次咁誇張嘅情況佢就真係未見過囉⋯⋯

圖片來源:darknesschun/ptt

是咁的,話說事主本身就係用電蚊拍嚟對付啲飛蟻嘅,後尾佢發現啪極都好似冇乜用咁,於是咪出去買幾盒煙霧殺蟲劑返嚟試下囉!點知隔咗兩個幾鐘之後,當事主再次返到屋企諗住幫啲飛蟻收屍嘅時候,佢就發現原來班飛蟻大軍嘅數量真係好驚人,分分鐘煮嚟食都夠食成個禮拜咁滯呀!

圖片來源:吳峻光/YouTube

東一隻西一隻東一腳西一腳給批鬥⋯⋯

到底有咩方法可以對付到飛蟻大軍呢?

1)閂好門窗+煙霧殺蟲劑+吸塵機

2)閂好門窗+擺盆水落地+用燈照住盆水+將盆飛蟻水沖落廁所

3)閂窗閂門+青蛙(um⋯⋯想試都可以試下嘅,不過毛毛唔會試)

 

如果屋企已經有白蟻巢穴又點做好

有網民就表示,事主屋企嘅飛蟻多到咁樣樣一定係屋企已經有白蟻嘅巢穴。佢話,只要將一種台灣人叫做「法台寶」嘅農藥擠落白蟻嘅巢穴入面,咁過幾日啲白蟻就唔會再出現。另外,呢位網民仲話呢種農藥藥效長達5年,可以殺埋小強同螞蟻𠻹喎⋯⋯不過假如你屋企有養寵物嘅話,呢位網民就建議大家用過第二個方法嘞。

溫馨提示:以上方案純屬網民建議,如果屋企白蟻情況嚴重嘅話,最好當然係搵返專業嘅滅蟲專家處理啦!

 

 

 

資料來源:DavidJam/ptt吳峻光/YouTube

毛記電視網站 · 版權所有 · 不得轉載 Copyright © TVMOST.COM.HK All rights reserved