【Pantry攻防戰】我鎖到啲奶咁樣睇你班友仔仲點偷飲!

Office入面爾虞我詐、波譎雲詭,特別係喺Pantry入面,想守衛自己最愛嘅食物真係好難㗎!你以為喺啲嘢上面寫個名就會冇人偷食?Come on, James!你成熟啲啦,喺呢個弱肉強食嘅世界入面係唔會有良心呢回事㗎!

大家為咗防盜出盡法寶,最近就有網友喺Pantry雪櫃發現咗偷飲率第一嘅牛奶,居然畀同事用自己嘅方式封印咗呀!

圖片來源:WYP_PC3220Sharp/twitter

呢個咪臭係傳說中嘅鎖奶大法!居然用一支粗釘,一把鎖同一個膠兜就成功封住個樽口,冇鎖匙或者密碼都唔使旨意有奶飲呀!其中一支仲要用膠紙黐住個膠兜話有感染危機(Danger of Infection) ,你玩晒啦!

根據消息人士透露,呢個其實笨唔係普通嘅Office雪櫃,係警局Pantry個雪櫃呀!難怪鎖得咁高明啦,原來訓練有素~警局都會有偷飲事件?咁慈母都係人嚟啫,話唔定休班嘅手足見頸渴,想借啖飲下啫~你哋冇做錯!

圖片來源:utopiatoo/twitter

邊個話淨係阿sir先識咁鎖㗎!另一位網友都自創咗個牛奶鎖呀!鎖成咁,睇你班友仔仲點偷嚟飲!不過古乳有暈,道高一尺,魔高一丈,呢兩款咁強勁嘅牛奶鎖,居然都有漏洞呀!其他網民話,唓!喺個樽上面篤個窿咪得囉!真係突破晒盲腸呀⋯⋯

唉~你以為咁樣鎖住啲奶係為咗防盜咁簡單咩?你睇佢咁紥法就知佢其實係想調教下啲奶啦!點解?梗係啦,唔教下啲奶,一陣變壞咗點算呀?

圖片來源:maxnrgmax/twitter

話咗你㗎啦!出事㗎嘛!嗚,你睇佢而家學到幾壞,賊眉賊眼仲學人揸槍𠻹!不過毛毛相信佢內心仲係好純潔好雪白㗎⋯⋯如果未變酸嘅話⋯⋯咁酸咗點算?壞到入心,就堅係冇得救喇。

 

封面圖片及資料來源:WYP_PC3220Sharp/twitterutopiatoo/twittermaxnrgmax/twitter

毛記電視網站 · 版權所有 · 不得轉載 Copyright © TVMOST.COM.HK All rights reserved