【都啱嘅】同阿媽講紥一半頭髮 點知佢幫我咁樣樣紥⋯⋯

細個總係會覺得阿媽先係最識扮靚,所以細個嗰陣阿媽話出街著咩衫變咩look都聽晒佢話,大個睇返以前啲相,真係想大嗌「媽呀,好7呀!」。

美國有個妹豬諗住搵返細個啲相嚟睇下自己細個幾打耳啦,點知畀佢發現當年原來阿媽做咗一件令佢好𤓓嘅事呀⋯⋯

圖片來源:urchicahanna/twitter

就咁睇呢張相,都冇咩呀,咪一個天真活潑嘅小妹妹囉,塊面又冇畀阿媽化到馬騮PatPat 咁,係個髮型亂咗啲啫,做咩見妹妹條辮甩咗都唔幫佢紥返好呀!

圖片來源:urchicahanna/twitter

髮型嘅嘢,你識條辮咩~妹豬話原來呢個係阿媽當年精心設計嘅髪型嚟㗎!是咁的,當年妹豬跳舞表演,老師話個個都要紥起一半頭髮( half up half down ),咪叫阿媽幫手囉。啱吖,而家咪紥起咗一半囉~

圖片來源:urchicahanna/twitter

但係阿媽呀,老師講嘅紥起一半係講上下分半,唔係左右呀⋯⋯簡單嚟講,係要紥我哋平日講嘅公主頭呀。

圖片來源:urchicahanna/twitter

如果唔係拎返啲相出嚟睇,都唔知當年阿媽做咗件咁天才嘅事,兩個囡囡突出到呢⋯⋯最難得係老師居然冇出聲,仲照畀佢哋表演先冇傷害佢哋弱小心靈咋,而家睇返真係7到喊呀。

圖片來源:alisha_good22/twitter

圖片來源:urchicahanna/twitter

世界上咁聰明嘅阿媽又點會得一個吖?其他網友都Post咗自己嘅慘痛經歷出嚟同大家開心share,發現唔少阿媽都好鍾意咁樣紥起個女一半頭髮㗎⋯⋯明明自己都唔會咁紥,點解一對住個女就咁有創作力量同幻想㗎呢下?

不過你哋都應該慶幸當年唔係同阿媽講叫佢幫你剪一半頭髮,如果唔係⋯⋯Punk啲咁啫,冇事嘅,啲頭髮好快就生返出嚟㗎喇。

 

封面圖片及資料來源:urchicahanna/twitteralisha_good22/twitterjantlers/twitter

毛記電視網站 · 版權所有 · 不得轉載 Copyright © TVMOST.COM.HK All rights reserved