【好神奇呀】喺沙灘唔見咗隻戒指36年都搵得返?

有啲嘢你搵佢嗰陣就搵緊都搵唔到,唔搵佢嗰陣,甚至乎唔記得有件咁嘅嘢嗰陣,件嘢又走返出嚟喎,真係吹到啤一聲呀!但係有啲嘢搵得返都係好事嚟嘅,因為搵到嘅可能唔止係一件物品,係一份回憶呀~

圖片來源:ABCNews

呢個靚姐叫阿Deb,當Deb姐仲係一個少女嘅時候,佢同班Fd去沙灘開P,點知玩玩下嗰陣隻戒指喺手上跣咗落嚟呀!「撲通」一聲跌咗入水,就搵唔返喇⋯⋯

圖片來源:ABCNews

而佢右手邊呢位咁英嘅就係Jimmy叔, Jimmy叔平日最鍾意就係四圍去check嘢,check咩嘢?咪臭係拎住個金屬探測器地氈式搜索,睇下會唔會執到寶囉~本來Jimmy叔約埋Deb姐個fd去㗎,點知Deb姐個fd甩底,佢咪毒自去執金囉。

圖片來源:ABCNews

點知佢真係畀佢執到呀!唔係執到金,係執到Deb姐隻戒指啫。點解佢會知隻戒指係Deb姐嘅?因為入面刻住Deb姐個名囉~估唔到浸過咸水返嚟,呢隻戒指都冇穿冇爛喎。

圖片來源:ABCNews

圖片來源:ABCNews

最難得嘅係隔咗36年Deb姐居然仲戴得落隻戒指呀!你睇佢幾開心?開心到攬住Jimmy叔,仲要攬到實一實𠻹啵~

你實以為毛毛睇完會想即刻買返個幫女神搵返啲頸鏈呀耳環咁啦~傻啦,一個金屬探測器閒閒地都要成萬幾二萬蚊,那有錢⋯⋯到有錢買嗰陣,女神都變咗嬸嬸啦⋯⋯

封面圖片及資料來源:ABCNews

毛記電視網站 · 版權所有 · 不得轉載 Copyright © TVMOST.COM.HK All rights reserved