唔少人都鍾意去二手店尋寶，因為話唔定會畀你搵到名牌衫或者絕版模型，咁到時就發達喇！不過寶物呢家嘢唔係下下都係用值幾多錢嚟衡量嘅。有時可能係個物件嘅背後有啲特別故事或者回憶呢～

呢個靚女攝影師叫Kati，佢成日都會去二手店度買古董相機，特別係入面仲有菲林嗰啲呀。佢次次買完都會拎去沖曬，睇下入面有咩相，每一次沖曬都係一個驚喜咁話喎！btw，好似有唔少恐怖片都係咁開始㗎喎⋯⋯

今次佢就喺美國波特蘭嘅二手店度買咗圖中呢部相機嘞！咦喂，望落幾靚仔咁喎，唔知入面啲相會係啲咩呢？會唔會真有啲好靈異，好不可思議嘅相喺裡面呢？

咁大嚿雲嘅？睇真啲原來唔係雲咁簡單，係火山爆發呀！由部相機嘅年代同埋啲相紀錄嘅地點推斷⋯⋯莫非就係1980年嘅聖海倫火山爆發事件？嘩，呢件咁出名嘅事，毛毛細細個讀地理嘅時候就已經聽過呢個名喇！

對於一個攝影師嚟講，得到一張紀錄咗個咁珍貴嘅時刻嘅相，比起執到嚿金仲開心呀！但係估唔到驚喜陸續有嚟呀！

除咗火山爆發，原來呢筒菲林仲收埋咗洋蔥呀⋯⋯呢幅睇落好普通嘅大合照，居然係揭開呢部相機嘅身世之謎嘅關鍵！是咁的，Kati將珍貴嘅火山照同大合照登咗上當地報紙之後，就引到相入面嘅主角現身喇！

冇錯！就係當年喺相入面呢個BB喇！而家已經大個佬嘅Melvin話，部相機係佢阿嫲嘅，而呢幅合照裡面嘅人，唔止嫲嫲走咗好耐，就連阿媽最近都過咗身喇⋯⋯所以呢張相真係出現得好合時㗎，就好似想送份禮物安慰Melvin咁呀。嗚⋯⋯好衰㗎，又搞到人濕晒喇⋯⋯對眼⋯⋯

封面圖片及資料來源：Boredpanda