【毛記專訪】鍾意食薯條鍾意到開Page唔得㗎?

一講薯條大家會諗起咩呀?M記薯條嘅香味?定係茶餐廳下午茶嘅炸髀薯條呢?雖然薯條畀人嘅感覺只係一個配角,不過呢個世界上就有人幫配角開page,仲要個個post都千字文咁樣樣,將薯條變成主角!嗚哇,「我係薯條控」版主同毛毛講起食薯條嗰種興奮,就好似毛毛聽到打8號波唔使返工咁呀⋯⋯

 

「點解你咁鍾意食薯條先?」

鍾意食薯條唔奇,但鍾意食薯條鍾意到特登經營一個page嘅⋯⋯毛毛都係第一次見。到底點解呢位薯條控咁鍾意食薯條呢?佢話冇得解,自己由細到大都好鍾意薯仔,總之任何薯製品都係佢嘅飛佛啦!

佢同好多人一樣,一開始接觸薯條嘅地方係M記,仲有法蘭西餐廳。愈食得薯條多,佢就愈覺得薯條好慘,點解薯條成日都畀人放埋一邊做配菜啫?或者大家唔會為咗食薯條而刻意去一間餐廳,但佢會。 

 

「喂,不如你試下開個Page吖!」

其實薯條控未開page之前已經喺自己facebook account開咗個叫「另類生活-i love potato」嘅相簿嚟寫食評。一開始佢只係好簡單咁寫幾句,隨住佢越出越多post,佢亦越寫越詳細,詳細到一班朋友叫佢索性開個page嚟寫飽佢吖笨!就係咁,薯條控決定為薯條開page,同廣大市民推介一下廢青價嘅高質薯條!

薯條控本筆記密過死亡筆記呀!

 

「你講!點先稱得上係好味嘅薯條?」

有睇過「我係薯條控」呢個page嘅朋友仔都知,薯條控寫嘅食評詳細到不得了,除咗性價比評分,連選擇性質都話埋畀大家知。「既然開得page,就要做到最好!」薯條控用堅定到不能再堅定嘅眼神望住毛毛講。

講到底,點先稱得上係好味嘅薯條?薯條控表示,其實好容易就會知道店主有冇用心整薯條。首先睇外觀,唔可以太燶同太油,望落要乾身,連張吸油紙都盡量唔好有太多油漬,兼且仲要擺得企企理理!嗱,做齊以上幾點係會有⋯⋯4分嘅(5分為滿分) 。至於口感呢,實心係基本,而擺耐咗都仲keep到溫度嘅就仲有得加分𠻹!

食薯條呢件咁簡單嘅事,喺薯條控眼中變得一啲都唔簡單,佢話每星期出一個post係對網民嘅承諾喎!雖然薯條控有時忙到即日食即日出稿,但佢從未試過拖稿或甩稿。唔知大家又有冇對一啲嘢好執著,執著到一定要做到完美先會安樂呢? 

 

「點解我好似未聽過你話啲薯條難食嘅⋯⋯」

喂,點解喺你個page入面睇嚟睇去都係得中上評價嘅薯條㗎?乜冇難食嘅薯條㗎咩?薯條控話,薯條就好難整得難食嘅⋯⋯就算真係有,佢都會連寫都唔想寫啦。其實薯條控開呢個page都係想話畀大家知,食薯條可以有好多選擇啫~所以劣評都係留返畀劣食家寫啦。 

 

「可唔可以幫我寫返篇鱔稿呀?」

話「我係薯條控」係薯條KOL應該冇人有異議,不過佢就話自己唔會食免費薯條,同絕對唔會寫鱔稿!咁當然,假如有機會嘅話,佢都想接下同薯條冇關係嘅廣告啦,畢竟食咁多薯條都要經費㗎嘛。

(如果大家食到正薯條,又想薯條控寫下食評嘅,歡迎隨時inbox佢㗎。)

「我係薯條控」提供相片

薯條控每次都會帶埋自己個招牌出動

 

毛毛後記

毛毛覺得薯條控好熱血,同埋好幸福。毛毛同佢做訪問嗰陣,佢面上嗰個幸福樣真係幸福到唔知點樣形容畀大家聽⋯⋯毛毛最記得就係佢講過:「如果配菜做得好,主菜都唔會差得去邊。」所以毛毛一於跟住「我係薯條控」個map嚟搵飯食㗎喇!(唔怕話畀大家知,喺未做訪問之前,毛毛一直以為薯條控個個星期食薯條一定成面暗瘡,但實情係,佢啲皮膚仲好過毛毛囉_。)

毛記電視網站 · 版權所有 · 不得轉載 Copyright © TVMOST.COM.HK All rights reserved