細細個同隔籬屋珠女玩煮飯仔嗰陣，啲玩具玩嚟玩去都係得嗰幾樣嘢，如果有成間舖頭咁大嘅地方，上面擺嘅全部都係玩具嘢食，可以將自己鍾意嘅嘢食掉晒落架購物車仔度，你話係咪玩得爽好多先！

大個咗雖然可以去超市買嘢啫，但係個感覺同玩玩具始終有啲唔同嘅～況且我哋係支持「不要玩食物」嘅乖孩子嚟㗎嘛。好似係。

嘩，呢間便利店望落又幾多嘢買喎，存貨仲幾充足?！買包薯片食下先～

咦，咁輕嘅？就算空氣多都冇理由咁離譜㗎？原來呢間便利店賣嘅唔係真嘅嘢食，係用不織布整出嚟嘅手工藝品呀！

除咗薯片之外，茄汁、粟米片、罐頭、麵包⋯⋯總之你諗到喺便利店度買到嘅嘢都有得買！（當然有埋廁紙啦，55。）

就連Pizza都有呀！真係見到都想買返件食呀！

呢個便利店嘅每一件商品都係由英國一個叫Lucy Sparrow嘅藝術家整㗎。佢喺兩年前就做過一個類似嘅展覽叫「Corner Shop」。不過今次呢個喺紐約嘅展覽就再大型啲，佢話呢間喺地牢嘅便利店就好似噏耷版嘅7仔咁喎。

點噏耷法呀？佢話連桶污糟水入面嘅死老鼠同埋烏蠅拍上面啲烏蠅都整埋出嚟呀！點解聽完反而仲想見識下咁嘅？

雖然話係藝術品，但係絕對唔係眼看手勿動咁冇癮㗎～喺呢間便利店見到嘅嘢，全部都真係有得賣㗎！不過價錢就梗係貴過平日見到嗰啲真商品好多啦，話晒件件都係Handmade㗎喎。唔知佢哋收銀機下面個貨架啲嘢係咪同香港一樣，有咁多隻味揀㗎呢？毛毛講緊香口膠咋嘛，你諗咗去邊呀！

封面圖片及資料來源：Hi fructose、Sew Your Soul 、Lucy Sparrow