邊個話淨係女仔先可以騷美腿㗎？男仔夠可以著短褲露出一對奪命香雞腿啦！尤其係夏天大熱天時嗰陣呀，著住條長褲出街想熱死人咩？

嗯，弊在返工就唔到你話事呢⋯⋯特別係衣著方面，啲公司寧舍多19規矩！就算你返份工唔使見人，佢哋都夾硬要你著到成個飲樣咁㗎！喂大佬呀，你做腦細就話揸車返工唔使點出汗啫，我哋啲打工仔大熱天時仲要追車逼巴士，真係好大陣汗味傳入我的鼻㗎嘛⋯⋯

於是英國呢位網友Joey哥就決定挑公司機喇！其實佢都只係著咗條正正常常嘅深藍色布短褲啫，加埋上身件恤衫，都算薯嘜茄so吖～不過不出佢所料，果然佢即刻就畀公司叫佢返屋企喇！

Joey梗係有後著啦～你話我唔符合公司男裝嘅服飾規矩，咁我跟女裝規矩係咪就冇問題先？

所以Joey就著咗件好嬌俏嘅粉紅色短裙返公司喇～嘩，索到你呀⋯⋯睇到硬晒⋯⋯個拳頭呀！不過唔好理佢靚唔靚先，咁都算符合公司個Dress Code吖～

所以Joey返到去之後，連腦細都吹佢唔漲，唯有由得佢咁樣返工喇⋯⋯反正佢做Call Center，都係聽電話啫，睇唔到佢著咩嘅。好似係。

唔知係咪咁樣搞一搞，搞到腦細「茅廁頓開」！佢終於諗通咗，肯畀男同事著3腳骨褲，即係比長褲短四分之一咁多呀，真係多L謝你呀⋯⋯

算啦，都算係階段性抗爭成功吖，話晒今次係Joey哥犠牲色相為大家爭取福利，成班兄弟先可以畀嗰一細截腳瓜唞下氣咋，咁大家記得好好慰勞下佢，買定另一條靚裙畀佢下次著喇～

封面圖片及資料來源：jBarge_／twitter