保護自己，要有一套！呢句就係人都識講啦～而家啲套又多款式又多味道，以前又邊有咁多花款㗎，求其有嘢笠住咪算囉！雖然話就話求其有嘢笠就得，但係究竟同而家嗰啲套套爭幾遠呢？

最近大陸瘋傳兩張1978年出品嘅避孕套相，對呢方面歷史咁有興趣嘅毛毛梗係要研究研究啦！

咁似喺手套度剪出嚟嘅喂！不過咁多年前嘅出品就唔好咁高要求啦～仲要用紙袋裝，一袋有兩個，一定係驚一次一個唔夠，畀多個你喇！真係好體貼呀～咪住先，睇埋後面個說明書點用，咁就萬無一失啦！

睇下第1點：「本品共分大、中、小、特小號4種規格，應選用適當，不宜過鬆或過緊。」，特登分咗4個size，仲提你哋啲人冇咁大個⋯⋯頭就唔好戴個套，真係Kind of Sweet！毛毛真係好想知道當時用特小號嘅人，每次去買係咩感受⋯⋯

咁都未算係最精彩，睇埋第五點先啦！「如需再用，須洗淨、晾乾、塗上滑石粉或爽身粉備用。」原來卅幾年前啲人就已經咁環保，識得循環再用㗎喇！真係要畀啲掌聲鼓勵下佢呀！啪啪！啪啪啪！咁兩個咪可以用好耐囉～真係好抵呀！

唔怪得之前網上流傳嗰位仁兄咁機智，用完一邊反轉個套就再用過啦！話唔定係阿爺嗰代傳落嚟嘅環保知識嚟㗎喎！不過兄台，你漏咗要洗乾淨再晾乾先用呀⋯⋯下次記住要洗喇，如果仲有下次嘅話。

Btw，一諗起網友手上呢個1978年出品嘅Dom Dom，竟然咁多年都冇機會畀主人用過，毛毛就唔知點解有種淡淡嘅哀傷⋯⋯

封面圖片及資料來源：山東魯能吧／百度貼吧