【有錢就是任性】Prada出萬字夾賣成千幾蚊一個?

Fat唇嘅嘢,畀你估到就唔係帶領潮流啦!就係要你估唔到,先可以走在潮流嘅尖端吖嘛~最近一眾Fat唇巨頭陸續推出貼近生活嘅商品,例如似足洗衣籃同Ikea購物袋咁嘅手袋,仲有啱晒廁所用嘅啫喱膠拖,真係令大家大開眼界呀!

圖片來源:Barney NewYork

睇住,呢個笨唔係一個普通嘅萬字夾⋯⋯

圖片來源:Barney NewYork

係Prada出嘅萬字夾呀!正確啲嚟講,係萬字夾款嘅銀紙夾。多錢到要用個夾嚟夾住啲錢已經夠威啦。最重要係咩呀?有Prada呢個字刻喺上面㗎嘛!

平時啲萬字夾,一盒都係十零廿蚊度,咁Prada呢款大銀紙夾又要幾錢呢?

圖片來源:Barney NewYork

係185蚊美金,即係千幾蚊港幣呀!用千幾蚊嚟買個夾夾住啲錢,毛毛真係睇唔透⋯⋯不過佢個網上面寫話個夾係純銀做嘅,可能或者有機會真係要咁貴呢~好似毛毛呢啲窮L真係識條銀咩?

最重要係咩呀?個牌子吖嘛!淨係嗰五隻字,每隻字都起碼值兩舊水啦!咁計法個夾都係幾嚿水啫,抵呀!

圖片來源:Peaceminusone

畀多個例子你睇就明㗎喇,之前GD建立品牌PEACEMINUSONE嗰陣,其中一件商品就係呢個鐵夾,係呀,講明係鐵造,加咗個牌子上去,你估幾錢?係$29.3美金,即係二百幾蚊港紙呀~嘩~話晒GD個牌子長咁多,逐隻字計咪抵過Prada好多囉~

睇完呢堆夾之後⋯⋯毛毛決定全副身家投資落一把𠝹刀度,跟住喺公司啲萬字夾度刻返LB、啫啫阿掹尼同埋箍肚臍咁,再賣返畀啲同事,簡直係商機無限呀!呢鋪毛毛仲唔發?

 

封面圖片及資料來源:Barney NewYorkPeaceminusone

 

《帶領潮流系列》

【潮流嘅嘢】新出嘅Puma x Rihanna拖鞋咁似屋企廁所嗰對嘅?

【Fashion嘅嘢】請問呢個手袋靈感係咪嚟自洗衣籃㗎?

【Fashion嘅嘢】而家興魚網襪襯爛牛?用Marker畫咪得囉!

毛記電視網站 · 版權所有 · 不得轉載 Copyright © TVMOST.COM.HK All rights reserved