【出土文物】100年前嘅電池竟然都仲用到?!

有時執屋喺床下底搵返十幾年前部Gameboy呀、傻瓜機之類,真係開心到跳掣呀,仲執乜鬼呀,梗係嗱嗱聲開嚟睇下仲著唔著先啦!一啪咗個ON掣,佢唔著機都好正路嘅,打開個入電位睇睇,唉,十幾年前嗰粒電池一早已經擺到出晒水喇,早知當年就算唔用部機都拎返粒電出嚟先啦……

圖片來源:hieiteitoku1121/Twitter

粒電池擺十幾年就唔用得,正一廢青!人哋呢粒日本電,成個世紀都仲生勾勾企喺度呀!話說有個日本網民買到粒100年前嘅電池呀!嘩,真係唔講都唔知,原來電池呢樣嘢已經有咁耐歷史喎!

圖片來源:hieiteitoku1121/Twitter

呢粒電池界嘅大牛龜有14.2cm高,直徑有7cm,成1.3kg咁重,拍埋而家嘅電池度真係好大對比呀!如果以前啲人要拎粒後備電出街咪辛苦到好似擔泥咁?

圖片來源:hieiteitoku1121/Twitter

難得面前呢粒古老電池唔係放喺博物館玻璃箱入面,而係喺自己手上,梗係要做下小實驗啦!呢位網民將電池駁落部計數機度,個結果係……成功㗎!部計數機仲可以正常運作,冇發生爆炸𠻹!真係估唔到呢位電池老友記成百歲都仲用到呀,老而彌堅,你班廢青學下嘢啦!

 

 

封面圖片、資料來源連結:hieiteitoku1121/Twitter

毛記電視網站 · 版權所有 · 不得轉載 Copyright © TVMOST.COM.HK All rights reserved