《100毛》#286期封面專題 人天生根本點先可以愛死身邊的一個?

人可唔可以一世愛死身邊的一個?可以啩,睇下嗰個係邊個囉!

望下身邊,呢邊係令你相愛勁多障礙嘅屋企人,嗰邊係死性不改嘅老友,仲有拖住嗰個——鍾意成日怨你冷落佢嘅Girl(s)或者大唔透嘅大男孩Boy(s)!唔講愛死唔愛死,有時愛佢哋都就嚟愛到要死喇。你愈愛,愈明白咩叫愛是含淚忍耐,成日作害羞的事(即係冷戰要你道歉先,唔係你錯都要認錯囉)……

當然你心底明白,愛你喜愛嘅人,怎麼會怠慢,怎麼會難?但有時愛得太辛苦,不如問問已經愛足對方15年嘅BOYZ點樣愛多百二年,態度都唔會改變啦?話唔定學返兩招,真係可以愛死身邊人一世呢?

Love Love世界

人天生可唔可以愛死身邊的一個?呢個問題對Steven(張致恒)嚟講,完全唔難答:「如果係對住佢(關智斌Kenny)嘅話,係得嘅。我好愛佢,愛佢愛到死㖭㗎!始終一齊做BOYZ,如果我唔愛佢,好難磨合到隊好組合出嚟;仲係必須身體力行用細心耐心去付出,先Keep到呢種愛。」

愛要行動,Kenny都明,所以甚至唔介意做埋人哋表哥。「嗰時簽約Steven未夠18歲,公司要佢讀埋書,我就帶佢去報學校。校長見個𡃁仔帶住另一個𡃁仔話讀書,就問『你係佢邊個?』我衝口而出話係表哥,咁就一世表哥喇!結果每朝都畀校長電話嘈醒,『張致恒今日冇返學喎,表哥你知佢去咗邊嘛?』我又要喺度扮話『呀我叫醒佢先』,但我根本都唔知佢去咗邊,搵佢唔到㗎!」

Steven都決定要用返行動回報Kenny:「我裱…你。整張感謝狀裱起呢件事呀,銘記在心。」

總有一日愛上你

想愛身邊人愛足一世,好似好難,但又好似其實唔難。「去維繫一段關係,有時可能係要放鬆,等佢自然去發展;你愈去諗方法,反而愈難去維繫。BOYZ都有段時間各有各忙冇搵過對方,就算唔開心都唔會搵對方傾計訴苦……但當佢一有事我就會喺佢身邊;我一有事佢亦會企喺我身邊,關係就係咁玄妙。其實同屋企人一樣,就算唔係成日見面,但嗰種牽絆你離開唔到㗎嘛!」

Steven補充,愛在當下就一定冇錯。「好似我哋嚟緊嘅演唱會,或者大家都知可能係One and only,亦未知完咗之後會點。正因為唔知幾時會再聚,所以彼此都更加珍惜一齊相處嘅時光。」即係把握機會愛錫身邊人係咪?「唔係把握嘅,講到好似就過身咁!係享受每日一齊行嘅每一步。」

係愛呀,罵你!

至於講到同身邊人表達愛意,鬧可能都係一種方法嘅。學Kenny話齋:「我哋相處好似鬧交,一意見不合就『你冇嘢呀?痴線㗎?』一句射埋去。但正正係熟到冇需要轉彎抹角或者掩飾,先可以咁講嘢。你唔覺對住屋企人講嘢特別大聲咩?係因為你太錫嗰個人,當緊張佢忟佢,就會將關心嘅情緒一下子冇修飾咁講晒出嚟。一世人入面,冇乜幾個人可以培養到咁樣好直接講嘢嘅感情㗎。」

成日畀人「鬧」嘅Steven表示認同:「阿Sa(蔡卓妍)成日叫我唔好再激Kenny,咪爆血管㗎喇。不過嗰種鬧只係一種親切嘅責備,佢其實對我好好。以前試過去外國拍嘢,要扮街頭賣藝彈結他,我淆底好緊張唔肯做,結果Kenny都冇鬧,只係話『我頂啦!』然後咩都佢做晒。加上佢而家鬧少咗我,親切好多!對我啲爛Gag都寬容咗,以前會打我一錘,而家苦笑就算。聽得爛Gag多,個人笑呵呵?」喂大佬,咁爛又真係好難忍得住唔鬧喎……

愛的回憶都是我的

係咪堅係可以一世愛死身邊人,BOYZ都肯定唔到(暫時愛咗15年),但可以肯定嘅係,愛過,必留痕。「嗰時澳洲旅遊局贊助我哋拍旅遊特輯,兩個禮拜我哋喪食嘢!蟹鉗當雞髀食仲有雪糕……結果拍到尾我哋肥晒搞到唔接Shot!」Steven愈講愈興奮,「仲有玩機動遊戲『洗衣機』,我唔轉得,但畀Kenny氹兩句就跟咗上去。結果一轉就玩到嘔,一路轉噴返晒落自己個頭,畢生難忘!」

「好搞笑。我玩完好開心,仲望住Steven頂帽啲嘔吐物問『咦點解你頂帽有啲嘢』,掂埋落去問咩嚟!」Kenny講講下都陷入咗「想當年」Mode:「又記得以前禮拜六日跑好多商場Show,有時一塞車,我哋兩個就一人拎一枝Mic stand,喺紅隧口度落車,著住成套西裝就跑!最記得小西灣藍灣半島,停車場出去仲有六層樓梯要跑,跑到上台就要即刻唱,嗰時冇得頂唔順㗎。」

毛毛,明白了。原來愛身邊人嘅最佳方式,就係陪住佢一齊經歷每個生活片段,咁愛愛下,就一世了。「BOYZ點解唔用S要用Z呢?因為Z係代表永恆,BOYZ會永遠持續落去。我哋永遠都係BOYZ,就算70都係。」呢個時候,Kenny忍唔住對解說緊嘅Steven講:「愛是永恆,當所愛……是你。」媽,好閃呀!

毛記電視網站 · 版權所有 · 不得轉載 Copyright © TVMOST.COM.HK All rights reserved