節目重溫
星期三港案

良心發現,認真製作,

緊貼時事,淺入深出。

毛記電視新聞部出品,每集5至10分鐘不等,

毛記主播聲音導航,超微型新聞紀錄片。

「冇痠攰嘅角度, 就係屬於你嘅國度」????
「用手機係要眼向前望, 誓不低頭」????
即係啲乜?

推拿師區師傅呢6年嚟一直喺港鐵附近範圍「嗌咪」,咁有恆心,就係想同大家講句:做人千祈唔可以低頭!
喺北京,一場火,引起咗清洗低端人口嘅行動。北京、北角... 原來可以好似!

就喺糖水道天橋,啱啱上演咗一場由6個政府部門,包括食環同警察清洗露宿者行動,要將呢班低端人口, 一個都不留咁洗走...

而喺呢班無人留意、被清洗嘅北角低端人口當中,依然有人選擇重返天橋...

屋企,天橋,到底對佢哋嚟講,代表啲咩呢?
近日,一名小一男仔懷疑喺學校畀同學仔欺凌,耳仔畀人塞咗擦紙膠。事件曝光之後,引起唔少關注。有研究發現,原來香港校園欺凌嘅個案數字係全世界之冠。

Joey個囡囡Betty,本身係一個跳跳紮、好鍾意睇書嘅乖乖女。但就因為佢讀書成績好,就引嚟其他同學仔對佢嘅欺凌。

要每日返學對住一班唔鍾意自己、甚至會傷害自己嘅同學仔,對12歲嘅Betty嚟講,呢個係一種見唔到盡頭嘅折磨,而對Joey嚟講,見住自己個寶貝女咁樣,做阿媽嘅,只係想呢一切都可以盡快停止。

依家嘅Joey,同其他有同樣問題嘅家長一齊開咗個Facebook page,希望用家長角色,做多少少嘢,唔會再有孩子因為被欺凌而受到傷害。
呢個少林和尚... 咦,有頭髮嘅?

原本俗名叫阿盼、法號「恒瑞」嘅佢,8年前、即係18歲嗰陣,因為覺得紅塵太痛苦,所以就唔理所有人反對,一個人去咗河南嘅嵩山少林寺,一心諗住做武僧,但因為本身精通多國語言,就留低幫住持做埋翻譯嘅工作。

「恒瑞大師」成頭頭髮,因為佢仲未看破紅塵、未可以遁入空門;仲未看破紅塵,因為有啲嘢始終未放得低,例如係達__同三上__ __......
嘩!呢啲獅頭好威猛喎!雖然都係用竹同紙紮出嚟,但係一啲都唔流,仲好靚添。
呢啲獅頭個老豆咪就係佢許師傅囉!

呢個師傅級人馬,39歲咋,但紮獅頭已經紮咗30年。經佢一手一腳整出嚟嘅獅頭仔,大大話話都有成千隻啦!

許師傅話,佢想等多啲人知道,紮獅頭,其實都可以係一門藝術。
但最緊要,都係想囝囝可以欣賞一下,呢個淨係識紮獅頭嘅老豆。
位於觀塘工廈嘅「Band界紅館 - Hidden Agenda」,因為5月入境處「放蛇」拉人、一連串嘅迫遷等等,場地終於喺10月31日,正式宣布結業。

HA負責人阿和由唐樓舖開始,到牛頭角、觀塘,一直堅持「用自己方式」去經營場地,甚至不惜同有關部門「開戰」至今。

阿和話,場地同物件都係身外物,惟有回憶,同一直撐佢嘅人,先至係帶得走...
最近網上有條好hit嘅電玩動畫宣傳片,個個睇完都話勁,但原來最估唔到嘅,係竟然成條動畫片都係香港人做嘅?

係啊,咪就係佢哋3個囉!阿Man、阿德同Tommy,本身係大學同學仔,返學個陣已經好熱血,晚晚留喺學校做動畫,日對夜對,畢業之後,仲一齊開埋公司添!

今次有外國公司睇中咗香港動畫,佢哋3個話要同香港人講:香港動畫,其實都可以係世界級㗎!
佢,係香港男子劍擊運動員崔浩然。

今年8月,喺全運會拎咗香港第一面男子花劍銀牌,創下咗香港劍擊喺全運會最好嘅成績。原來佢喺19歲個陣,就已經代表咗香港出戰倫敦奧運!

呢個嘻嘻哈哈嘅花劍美男子話,佢一開始選擇劍擊,係因為畀劍擊嘅華麗所吸引,但劍擊帶畀佢嘅,仲有無限嘅沮喪...
痛?係人都驚痛㗎喎。

瑪麗醫院嘅Danny醫生,一開始,因為一個型字,就由內科醫生,轉咗做麻醉科醫生。

而佢每日嘅工作,就係同「痛」打仗,用盡方法,等病人喺手術前後,唔使咁唔舒服,做大細手術個陣,都「唔痛,唔痛」。

之不過,痛有好多種,有啲痛係唔使受傷、唔使流血,亦都唔係靠食藥打針去好番...
呢班街坊講緊嘅嗰隻貓,就係觀塘一間藥房嘅貓店長波子!平時得人鍾意、安守本分看舖嘅波子,就喺上星期,畀一個來自中國嘅女人,聲稱喺藥房買嘢個陣,囝囝畀波子抓傷。

雖然睇完CCTV發現波子無掂過個小朋友,但呢個女人就堅持係都要報警,搵漁護署嚟捉走波子。而波子亦因為受驚過度,依家連舖頭都返唔到⋯⋯

成班識得波子嘅街坊,都相信平時善良嘅波子無整傷人。而一班同波子素未謀面嘅網民,仲喺網上發起聯署,力撐波子店長係無辜㗎!
毛記電視網站 · 版權所有 · 不得轉載 Copyright © TVMOST.COM.HK All rights reserved