早幾日強國有架貨車瞓底，碌咗廿噸蘋果出嚟，一大班村民見到，即刻狗衝去執蘋果，仲call馬叫多啲FD子去齊齊執，令到現場people mountain people sea。

廿噸蘋果，最後只係得返兩噸，都好呀，起碼唔係得返兩個呀，感咗恩未先？
噚日，幸運嘅事又發生喇，又有架貨車瞓底，碌咗幾萬隻雞仔出嚟，卡哇依呢！相入面淺黃色一點點嘅就係啲雞仔喇，真係chicken mountain chicken sea！

啲雞仔咁可愛，充滿愛心嘅同胞梗係立馬衝去執雞，免得啲雞仔畀車碌到呀嘛！可能同胞們覺得個司機太唔識保護雞仔安全喇，所以就索性帶埋返屋企，養埋佢哋下半世，好感人呀～

唔好話班同胞盲搶蘋果盲搶雞唔會還呀，毛毛深信，人性係有真善美嘅，就好似香港舊年單解款車跌錢案咁，都有唔少良好市民還返執到嘅錢㗎（不過係過幾日先還咋嘛）。唔知到時啲雞仔會唔會已經變晒老雞，或者投胎做返雞蛋呢？

資料來源：河南電視台、新京報