唔好睇比卡超成日PikaPika咁打耳，就以為佢仲係bb仔呀，其實佢成廿歲仔㗎喇！啱啱過咗嘅2月27號，咪Pokémon出世廿週年囉！

任天堂社長石原恒和仲好好心機咁特登用廣東話同香港嘅寵物小精靈訓練員打招呼呀！不過有好消息，又點會冇壞消息呀…… 佢宣佈中港台用開嘅Pokémon譯名，會統一做《精靈寶可夢》呀！嗚呀，雖然佢話「寶可夢」係保留個「Pokémon」個發音，不過毛毛真係覺得好唔慣呀……

如果香港真係跟晒台灣譯名，比卡超咪會變做皮卡丘囉？怪味花咪會變做臭臭花囉？仲有呀，毛毛真係接受唔到要叫背背龍做乘龍呀動L！

雖然條片就冇話小精靈名都要統一，不過香港嘅fan屎就驚遲下會咁做，所以最近就有寵物小精靈訓練員喺facebook發起聯署，要求保留Pokémon各地譯名呀！嗚嗚嗚，喺毛毛心目中，比卡超無論幾多歲，永遠都係比卡超！永遠都係一齊成長嘅同伴！唔講住喇，back after 簽！

封面圖片、資料來源：YouTube、爭取 Pokémon 保留各地譯名聯署、港台翻譯對照表

〈童年醉愛Pokémon系列〉
寵物小精靈唔係寵物 係一齊成長嘅同伴！
【很想要吧？】出嚟啦！卡比獸！ 大大個肚腩一嘢攤落去
【一定要睇到最尾】以為自己抽中比卡超杯緣子點知……
【童年崩壞系列】媽點解盞比卡超燈好似怪怪哋咁嘅？