Wyman曾經話過，任何難食嘅嘢只要拎上車食，就會變得好好味，毛毛都覺得，任何事只要喺飛機上發生，都會變會即刻浪漫100倍嘅～唔係點會咁多人唔係喺飛機求婚，就搞咩空中婚禮呀～

最近又有人喺3萬5千呎高空上面嚟個大surprise喇！

話說呢個老婆Lisa事前偷偷地畀咗張紙仔個飛機師佢讀出嚟，飛機師梗係不負所望，喺廣播度話喇：「我收到一張紙條，我想一字不漏咁讀晒佢出嚟，我哋要對一個喺拉斯維加斯贏到大獎嘅乘客做啲特別嘢。」呢個時候，老婆仔就全程偷拍老公仔Eric有咩反應，不過佢梗係仲呆呆下，咩都唔知啦！

跟住機長繼續講喇：「請大家都目光放喺坐緊29E位嘅乘客，即係Lisa個老公，Eric身上！」下？咩事呀？老公仔左望望右望望，29E咪我囉？我畀咗機票錢㗎喇，唔好玩我啦機長！

最後機長話：「好喇，其實你冇發大達，都冇咩贏咩拉斯維加斯大獎，但係恭喜你，你要做老竇喇！」Wow！大家一聽到呢度，都好high咁拍晒手同歡呼呀，而老公仔收到咁大個驚喜，梗係仲開心過贏大獎啦，即刻喺全場嘅啪啪啪聲之下錫啖個老婆仔，仲感動到流馬尿?呀！啪啪啪！真係恭喜晒喇！嗚呀，如果毛毛都有呢啲機會就好喇......

封面圖片、資料來源：ABC news

延伸閱讀：【內有洋蔥】 空姐飛機上行禮 滿足患癌媽媽三個願望