貓貓有病,要帶頸箍已經好慘,好傷主子嘅自尊心㗎啦(好似係),竟然仲有奴才乘機整蠱主人,真係好大嘅膽呀!
呢位住喺台灣嘅主子本身一直都養尊處優,生活喺食物鏈嘅最高層,點知一個唔小心生皮膚病,要帶頸箍,咁就即刻失晒霸氣喇……之但係主子又睇唔起一般嗰啲頸箍唔肯戴喎,結果就畀奴才有機可乘喇!
登登登櫈!最新款伽鎖式頸箍你見過未?只要一畀主子戴上就可以一秒變犯人,鍾意嘅仲可以喺鎖嘅兩邊貼上犯人嘅罪名,再瘋狂影相放上網公審佢,肯肯定可以洩你哋心頭之恨呀!
不過如果你個主子係方丈嚟,好返之後向你進行大報復,整到一地都係紙巾呀貓沙呀嘅話,就唔關毛毛事㗎下……
圖片來源、資料來源:林均表/貓咪也瘋狂俱樂部 CrazyCat club、小白~大餅臉肥屁股