之前日本多摩動物公園有隻喪照鏡嘅孔雀(順便重溫:【天生麗質難自棄】點解我可以靚仔到咁?),毛毛以為佢係太自戀啦,點知原來佢係驚自己個樣會嚇親人,所以先喪照鏡咋!下,乜孔雀咁靚都會嚇親人㗎咩?係呀,唔信你哋咪睇下呢位外國小妹妹囉:
嘩!孔雀開屏啫,又唔係開大……呢位小妹妹使唔使驚到奪命狂奔咁呀?雖然呢位小妹妹喊晒口咁陰公豬,但一眾網民見到張圖咁有潛力,都忍唔住要開個photoshop出嚟改一改!而家就等毛毛同大家一齊睇下有咩高汁作品先~
咦喂,呢隻咪《侏羅紀公園》入面隻恐龍?阿妹妹你拎住碌棒棒佢就梗係追住你啦。
不過,有人陪你跑都好過自己一個人孤軍作戰嘅~
睇下!連美國隊長都陪埋你跑,今期仲唔係你最威?
再唔係,跑到參加埋比賽又得,得咗!btw,呢場始終都係小妹妹同孔雀嘅決鬥,大家都係畀佢哋私了算啦好嗎?
嗱,畀隻孔雀嚇親咯,咪拎走晒佢啲羽毛囉,冇事嘅……正所謂風水輪流轉,只要你唔驚佢,佢就自然嚇你唔到㗎喇~
呢個故事教訓大家,怯,你就輸一世……好似係。
圖片及資料來源:bwaxse/reddit、dailyedge
回帶又回帶:【田北辰潛力圖】毛記讀者改圖大合集!