毛毛曾經都幻想過，畀啲心機叫自己唔好去日本同睇戲，然後儲夠錢畀首期，再租畀人住，等人幫自己供，都咪話唔爽皮呀！有時啲租客仲唔單止住你間屋，仲會將間屋重新裝修，甚至額外附送好多寶貝畀你?！事不宜遲喇，就等毛毛帶你參觀一下被呢位被愛心爆棚嘅女租客，重新改造過嘅屋會變成點樣樣啦！

未入門口，已經見到啲寶貝瀉到出門口喇！一打開門，嘩，簡直係世界奇觀呀！唔講以為自己開咗度隨意門，去咗柬埔寨著名嘅垃圾山呀！入面仲有N隻有八隻長腿嘅昆蟲，咁就唔怕寂寞啦！

聽講張梳化之前係橙色嘅，不過經過租客一番苦心重新上色之後，呢位業主就得到一張全新嘅黑色梳化喇！

睇下個廁所先，er…呢啲可能係潑墨藝術嚟啫，唉，藝術嘅嘢毛毛識條鐵咩！

參觀埋廚房，毛毛諗個租客都係想營造一下廢墟嘅頹廢美感啫，55！

最後一站去到睡房，睇嚟都曾經經歷過九九八十一個回合嘅激戰喎！咁學阿張家輝話齋，人生本來就係一場激戰嚟（好似係）！

參觀完呢個示範單位之後，毛毛覺得呢位租客肯肯定係百年難得一遇嘅無敵破壞王，能夠搞到間屋咁樣樣，諗深一層，真係少啲堅持毅力同忍耐力都做唔到呀！！

封面圖片、資料及圖片來源：香港業主會 Hong Kong Owners Club