明明七月十四都過咗啦，夜晚都仲係凝住一街都有啲嘢行下又停下…停下又飄下…仲要目光散渙，面無血色，得塊面有光…真係畀班小精靈訓練員嚇餐死呀。

呢排Pokemon Go咁hit，去到邊都見到比卡超嘅蹤影，就連盂蘭節祭品都唔例外呀！有台灣網民見到一間媽祖廟有特別的普渡技巧，就係用比卡超嚟做祭品！

枱上面嘅祭品仲有疑似鯉魚王同大量長腿動物，都幾得意吖係咪。其實呢啲七彩顏色嘅祭品叫做「看桌」，以前仲係農業社會，大家都冇乜錢，買唔起肉類嚟做儀式，所以就用麵粉整做牲畜同水果造形用嚟拜拜喇～到咗今時今日，就演變到加入埋卡通元素喇～

可能因為對盂蘭節文化認識唔深，或者毛毛本身係隻淆底獸啦，喺街上面見到有人燒衣紙或者拜拜，都會驚驚豬咁行快幾步。不過如果見到呢隻咁打耳嘅比卡超，實冇咁淆底啫！

至於呢隻比卡超……都真係幾有盂蘭節feel呀係咪……毛毛終於明點解媽咪成日叫我今個月唔好咁夜返屋企喇……

封面圖片、資料來源： 賈西雅