沙田十大清新影相位(上)

最近有一套以80年代沙田棒球隊「沙燕隊」為主題嘅電影上畫,戲入自然有唔少畫面都喺沙田取景啦。由細到大都喺呢個地方成長嘅沙田友睇完都表示好有親切感,勾起唔少青春回憶呀。其實沙田呢個新市鎮,唔係得雞粥同名牌林立、感覺愈嚟愈陌生嘅新城市嘅,今日就帶大家慢慢遊走沙田,睇下有咩清新影相位啦。

(1)禾輋邨

戲入面兩個男主角成日喺走廊跑嚟跑去嘅,就係禾輋邨喇。屋邨帶畀我哋嗰份人情味同集體回憶,「天・與地」嗰啲天價樓邊有得比。不過好風光多的是,屋邨平凡事,點解要特登介紹禾輋邨?因為佢天井地下有8張圓凳仔,圍埋一個大圓形,由上面影返落去,都幾特別㗎。如果同朋友一齊,仲可以叫佢坐喺每張凳影張相砌返個gif𠻹。

點去:沙田好運中心旁開始沿天橋一直行

 

(2)禾輋花海

春天一到,大家都會爭住去長洲影櫻花,或者山長水遠去郊外影鳳凰木、油菜花咁。其實花海近在眼前,交通方便嘅禾輋邨入面種咗好多棵宮粉羊蹄甲,春天嘅時候滿目粉紅,咩角度都影到靚相呀。除咗宮粉羊蹄甲,邨入面仲有唔少色彩繽紛嘅花,春天去影相真係好靚㗎。

 

(3)瀝源公園仔

而家畀細路玩嘅公園買少見少(放學去上興趣班好過啦),而且全部都錫住啲小朋友嚟設計,用晒硬膠膠嚟做材料,以前啲鐵製公園設施,全港唔係得返好地方搵到㗎咋。一見到呢幾張鐵製搖搖凳,真係咩童年回憶都返晒嚟。除咗瀝源,大圍美林邨都一樣仲有少少呢類古董㗎。

 

(4)城門河

講得沙田,又點可以唔提起城門河呢?毛毛仲記得小學嗰陣仲係冇冷氣嘅年代,日日都聞住河臭上堂……好彩近年城門河異味問題已經改善咗好多,而佢嘅景色同往日一樣咁迷人。日頭影就夠清新,黃昏就夠浪漫,夜晚都好舒服㗎。

點去:城門河好長,沙田或大圍火車站、車公廟或沙田圍馬鐵站都可以去到

通常一講到城門河,大家又淨係諗到最典型嘅「橫橋+直河」畫面,其實河邊仲有好多穩秘靚景㗎。換個角度,用沿河嘅橋仔做主角,一樣夠晒清新。成條河咁長,除咗大家最熟悉嘅瀝源橋同沙燕橋,上面仲有唔少窄窄嘅橋仔,就好似沙田官立中學對出,通去車公廟馬鐵站呢條橋仔咁,畀啲耐性,等到冇人行嘅時候影都幾有feel。

點去:大圍火車站或車公廟馬鐵站

要清新,又點少得綠油油嘅畫面呢?河邊嘅小路兩旁長滿大樹,無論散步定影相都好舒服。呢張相就喺車公廟馬鐵站附近影嘅~

點去:車公廟馬鐵站B出口

 

(5)富山下城門水塘堤壩

富山有個火葬場就係人都知,不過唔好以為富山生人勿近呀,因為你會分分鐘錯過咗個影相靚景!上到嚟堤壩,嗰種感覺唔止係與世隔絕咁簡單,直頭係瑞士山區肺!一大片草地加埋藍天,想唔清新都唔得啦。(溫提:唔好行咁出,會轆咗落山)

點去:大圍火車站 D 出口村南道乘 64K 小巴至富山總站,再步行上山

毛記電視網站 · 版權所有 · 不得轉載 Copyright © TVMOST.COM.HK All rights reserved