上個月零食界發生咗件震撼700萬心靈嘅事，就係營多撈麵味薯片橫空面世！係人都知營多撈麵陣味真係聞到都流晒口水，仲要變做薯片脆卜卜口感，真係不得了呀！今次就貪心啲，試下「營多撈麵味薯片撈營多撈麵」，睇下是咪真係有雙重享受？！

首先，材料包括：營多撈麵味薯片一包，營多撈麵一包。至於側邊棵缺乏照顧以致垂死嘅不知名植物，係冇作用嘅，純粹從畫面上減低熱氣感。

第一步，整熟個營多麵先。冇錯，毛毛話「整」熟佢而唔係「煮」熟佢。呢款麵本身係要煮嘅，麻煩啲，但平過杯麵一截，所以唯有照買佢啦。喺公司冇得開爐煮，又唯有強行落熱水再叮兩三分鐘整熟佢啦。食個麵都咁多妥協，鬼叫你係毒L咩。

跟住就隔咗啲水佢再落埋一包二包味精撈勻佢。由於包營多薯片係辣辣地嘅，所以毛毛就冇落撈麵包辣醬喇。

最後一步，亦都係最關鍵嘅一步！就係有請營多薯片出場！唔好睇小呢個step以為好輕鬆呀，其實倒薯片嘅力度同角度都會影響到成兜撈麵嘅味道！斜斜地，45度，用陰力倒出嚟就最fit喇……下，你真係照做呀？

影完相，就梗係整碎啲薯片出盡奶力咁撈啦，咁大塊叫人點食呀。

真係食得喇，脆卜卜嘅薯片加埋撈麵個口感真係一流，就好似落咗好多炸蒜咁嘅感覺。啲薯片聞落就香，食落只係普通鹹味，所以唔可以話係double營多享受，不過熱氣程度就真係double喇。溫提，食完記得飲返多啲水，冇咁熱氣呀嘛，同埋……你知個麵咁細個，唔飲水等佢喺個肚度漲啲點夠飽。