就嚟Halloween，唔少妹豬都已經準備緊今年要扮大熱嘅小丑女去party，不過咁，小丑女就話索爆啫，小丑佬就嚇爆喇！最近英美、澳洲等等地方都出現恐怖小丑（Creepy Clown）瘋潮，嚇到大人細路都心慌慌呀。

恐怖小丑會企喺路邊向住路人詭異咁笑，笑到你心中發寒，甚至追住路人或者拎住武器嚇人，搞到好多家長都擔心有壞人乘機戴住個小丑面具拐細路仔！

好彩，恐怖小丑嘅天敵－蝙蝠俠終於出現喇！最近有網民影到蝙蝠俠喺英國Cumbria 嘅街上追住恐怖小丑嘅畫面，唔通佢想打9小丑，打救小朋友？！

原來蝙蝠俠真身來自當地專門一個為兒童送暖嘅組織 Cumbria Superheroes，佢哋平時都會著到好似超級英雄咁探訪小朋友，帶希望畀佢哋。今次佢哋扮成蝙蝠俠唔係想行私刑打9小丑，而係話畀小朋友知會有正義力量保護佢哋。

有又pure又true嘅小朋友睇到張相之後，就留言多謝蝙蝠俠哥哥，話自己而家唔再驚驚，可以如常返學喇！佢仲順便話自己好希望聖誕節會見到蝙蝠俠哥哥同佢架Bat Mobile?，睇嚟係忠實fan屎喎～ 雖然可以安撫小朋友脆弱嘅心靈都係件好事，不過都希望呢個咁無聊咁恐怖嘅小丑瘋潮會快啲完啦！

封面圖片、資料來源連結： bbccumbria、telegraph.co.uk、CNN