毛毛覺得有時啲嘢係真係好難分㗎，例如對某啲人嚟講鹿同馬都分唔出啦，不過毛毛嘅求知慾實在太強，有啲嘢唔搞清楚，係冇嘢可以叫我放棄㗎！就好似呢張喺Twitter惹起熱烈討論嘅相，究竟呢一隻係狗定係貓呢？

第一眼睇落去，真係成隻喵星人咁樣，但望得耐，又覺得有少少似汪星人啵～ 根據毛毛9估，呢隻如果唔係狗嘅話就一定係貓！一定係，除非唔係！有好多網民都化身生物學專家，由頭到腳分析呢隻介乎貓與狗之間嘅生物，有人話佢可能係混種嘅Cog (Cat加Dog)，又有人話可能係同其他野生動物Mix咗，不過大家嘅眼晴都係雪亮嘅，從瞳孔分析佢一定係有貓嘅血統多啲。

謎底亦都好快就畀Twitter嘅Po主解開咗啦，佢係一隻叫Atchoum嘅波斯貓，不過患咗先天性遺傳多毛症(Hypertricosis)，所以就好似狼人咁，會不斷生好多好長嘅毛。嘩！咁咪有好多個毛毛囉？佢唔止多毛，仲有好多粉絲㗎，佢嘅挨豬已經有166k 人Follow緊㗎喇！

雖然佢個樣好似有啲惡，啲毛又長，但其實佢內心好Pure好True 㗎，你睇吓佢嗰瞓覺樣，係咪好想摸吓佢啲鬆軟嘅毛毛呢～

其實多毛又有咩好怕喎，毛毛一向都好對自己嗰堆濃密嘅毛好自豪㗎，毛毛講緊嘅係啲頭毛呀。唔知點解一睇到佢就覺得有一種好親切嘅感覺，然後毛毛終於諗起佢似邊個啦！係發明電燈泡嘅愛迪生，個同門師兄弟呀！

封面圖片及資料來源：每日郵報、n2o/twitter