日本啲楓葉同向日葵仲曬緊太陽嘅時候，竟然就開始落雪，個個一瞓醒就發現條街變晒白色，真係好夢幻好surprise呀！不過我哋人類就識即刻著返件大褸啫，天氣變得咁快，動物又邊度識啵？

好彩，醒目嘅雀仔都識得匿喺車底避雪～呢班麻雀仔企定定喺車下面，遠睇好似一粒粒麻糬咁，呢個畫面真係好治癒呀！平時成日都見到麻雀仔，覺得冇咩特別，但估唔到咁樣睇又覺得佢哋肥嘟嘟圓碌碌幾打耳！

「吱吱，老婆呀我收工返緊嚟㗎喇……」

「我今日冇帶遮呀老婆你落街接我得唔得呀吱吱？」

見到呢班麻雀仔心急返屋企個樣，就覺得佢哋好似放工落到樓下先發現落雨但又冇帶遮嘅我哋喇！

唔好嫌毛毛長氣呀，天氣開始凍，除咗雀仔，仲有唔少流浪貓仔狗仔會匿喺汽車引擎或者車底取暖㗎，所以有車嘅朋友記住記住記住！開車之前拍一拍架車，話畀匿埋嘅貓仔狗仔知你要出車，等佢哋跑返出嚟呀！

スズメに愛されしクルマ pic.twitter.com/Rz8dGVFKAE

— かず ・ω・ฅ (@KARASUKA_NighT) November 24, 2016

封面圖片、資料來源連結：KARASUKA_NighT／twitter、邱偉明

延伸閱讀：【好有愛】多得好心人寫字條提醒 先救返引擎入面嘅貓仔一命