雖然好多人口口聲聲都話唔重視生日，但講真吖，假如有一大班fd子記得你生日之餘，仲特登準備一場大龍鳳嚟同你慶祝，你感唔感動先？而最近，有班台灣網民都為咗一個fd子嘅生日，落足心機咁炮製一個充滿愛同勇氣嘅生日蛋糕畀佢喎！一齊睇下～

咩話？竟然係麥樂雞朱古力蛋糕？

是咁的，呢幾位網民就話，壽星女平時就好鍾意食麥樂雞同朱古力嘅，咁所以佢哋咪將麥樂雞同朱古力溝埋一齊做麥樂雞朱古力蛋糕囉～

一開始，佢哋就焗咗兩個朱古力蛋糕出嚟先，然後再喺其中一個蛋糕上面搽一層厚厚嘅榛子醬，跟住將兩個蛋糕疊埋一齊。之後，佢哋再喺中間挖一個要嚟放麥樂雞嘅窿，放埋塊錫紙上去就可以放麥樂雞嘞～而最後就梗係輪到裝飾嘅部份啦！

睇下，佢哋仲將個蛋糕裝飾到好似M記分享盒咁?！

唔講唔知，其實啲麥樂雞同薯條都係佢哋自己親手炸㗎～佢哋話喎，雖然啲麥樂雞同薯條到時可能變得冇咁好食，不過最重要都係有心意同創意呀嘛！咁又係嘅，見到班fd子搞咁大壇嘢都係為咗氹你開心，仲唔即刻感動到流馬尿咩！

資料來源：dcard