話咁快嚟到12月，除咗代表聖誕節就到之外，對美國嚟講，仲代表白宮就嚟要轉新主人。喂，話晒都係奧巴馬喺白宮最後一個聖誕，一班員工就梗係唔會放過整蠱腦細嘅最後機會啦～等你平時仲咁百厭吖嗱！兄弟，做嘢！

呢次最後一擊特登請咗4隻雪人公仔做客串嘉賓。為咗唔令腦細懷疑，早一個星期就帶咗呢幾個雪人入白宮喇～而就喺早幾日，一班白宮職員就趁奧巴馬專心做嘢嗰陣，放啲雪人喺佢附近四個窗口，等佢突然見到有雪人望住佢，實行要嚇到腦細心都離一離！

你哋睇下雪人個樣，喺佢背後望住腦細咁陰陰嘴笑，真係笑到你心都寒埋，完全係「I'm watching you」個表情呀！唔知奧巴馬有冇feel到背後有股涼意呢？

腦細驚嚇樣Gotcha！古乳有暈：「道高一尺，Boss高一丈」，你以為真係嚇到佢咩？腦細見自己就嚟要走，諗住氹下你哋咋～

吖，如果換咗侵侵雪人望住你，唔知奧巴馬又會唔會嚇親呢？btw，你哋呢班打工仔有得玩就好玩喇，你知啦，下個腦細未必肯咁同你哋玩㗎嘛，55。

封面圖片及資料來源：petesouza／Instagram、WhiteHouse／Twitter