熱咗咁耐，今個星期終於都見到一字頭嘅氣溫喇，不過唔少人都覺得一月嚟講都唔算凍喇，冇乜冬天feel咁話。我哋人類就話有得著大褸又有室內暖氣啫，對冇瓦遮頭嘅流浪貓貓嚟講，而家可能已經好凍㗎喇。

唔好嫌毛毛長氣呀，有車嘅朋友，真係要記得開車前拍一拍車身，叫醒懶瞓嘅浪浪，因為佢哋最鍾意匿喺汽車引擎度取暖，如果出車嘅時候冇叫返佢哋出嚟，咁就大件事喇！但原來貓貓唔止鍾意匿喺引擎，仲可能會匿喺車頭入面！

話說大埔有個暖男話佢朋友噚晚開車之前發現車頭有隻貓貓匿埋咗，就call咗愛協去幫手救貓喇，不過因為光線不足而唔成功。到咗今朝早，貓B仍然喺車頭入面，所以就搵咗暖男嚟營救喇！

五分鐘都唔使，就成功將貓貓救出喇，原來係隻好細粒嘅BB仔嚟呀！貓B畀暖男抱返出嚟嘅時候，成身都污糟晒，仲夾到條尾仔實一實，一定係好驚喇……放心啦，出返嚟，好快冇事㗎喇！

貓B而家暫時住喺呢位英勇嘅大埔暖男舖頭，附近嘅街坊都會去睇下佢㗎～毛毛問過呢位大埔暖男（絕冇私心），佢話自己已經養緊兩位主子，會唔會收養埋貓B就要認真考慮下先。好多謝你救咗貓B出嚟呀，希望貓B快啲有個溫暖嘅屋企啦！

封面圖片、資料來源連結： Yin Chong／Tai Po 大埔

同場加映：【好有愛】多得好心人寫字條提醒 先救返引擎入面嘅貓仔一命