貓星人係神一般嘅存在（至少佢哋自己覺得係），所以主子見到神枱就會情不自禁咁爬上去，都係因為你哋啲愚蠢嘅人類竟然冇安排一個地方供奉佢咋！如果唔想主子同屋企嘅神明爭位，就要學下呢個奴才咁，幫聖上整返個神殿，咁先襯得起主子嘅超然地位㗎嘛！

呢個神殿其實係貓奴依照外國教學影片製作嘅，但係作為一個合格嘅奴才，梗係要按主子嘅需要度身訂造㗎啦！所以奴才就將個神殿改高啲啲又改窄啲啲，咁先望落又靚、間隔又實用㗎嘛！

呢位廿四孝奴才話成個神殿最考功夫嘅係啲柱，碌碌都要一樣，又要磨到滑一滑唔好整親貓貓嬌嫩嘅肌膚，又要做到由下而上變幼嘅效果，真係碌碌皆辛苦呀！

淨係跟住條片起個神殿，又點可以表現到奴才對自己主子嘅忠心同愛呀？所以奴才唔止砌，仲要雕！就係喺個橫樑度雕埋貓貓圖案呀～算你啦！

不過呢個奴才其實笨唔係主子嘅奴才，係主子嘅奴才嘅男朋友呀（a.k.k.畀貓奴管住嘅奴才），難怪咁落力討好主子啦，原來有人想行主子政策～都啱嘅，只要有主子撐腰，以後打機咪可以話係「神」叫我去打囉！

聖上：「呢座神殿都起得唔錯，你以後準時奉上罐罐，朕就保佑你畀人打少啲啦喵！」

各位兵仔，如果想得到養貓嘅娘娘歡心，不妨學定點整，再帶多幾罐上等罐罐獻畀主子，話唔定主子會保佑你早日升lv呢！

封面圖片及資料來源： ptt