2017年01月28日 星期六
【企定定】姪仔你做咩用圖書嚟封印柴柴呀？
老老77，用紙碟加膠紙將小強封印喺牆上面毛毛就見得多，但用兒童圖書嚟封印柴犬喇喎……毛毛都係第一次見啫！
是咁的，話說最近有位日本網民見到自己嘅姪仔竟然棟高四五本兒童圖書嚟圍住隻柴柴，好似想封印住柴柴唔畀佢周圍走咁款，而隻柴柴又真係好乖咁企定定喺個兒童圖書封印陣入面喎……
下，做咩要困住柴柴咁陰功豬呀？雖則毛毛知道一眾柴柴天生可愛就是任性，成日搞到主人頭都大埋啫，但你都唔使出動到封印之術咁大陣象下話？大家睇下呢位網民嘅姪仔搞到柴柴嘅眼神幾咁無奈～真係隔住個mon都好似聽到柴犬版《每一個晚上》咁呀！
btw，邊個話一定係呢位網民嘅姪仔嫌柴柴任性就想封印佢㗎？調返轉係柴柴唔想畀百厭小朋友煩9住，所以先搵堆圖書嚟圍住自己唔得㗎？早前台灣都有位老竇因為困唔住自己個百厭BB，於是改為用圍欄困住自己啦！
any肥，呢位網民個姪仔連平時出晒名難搞嘅柴柴都搞得掂，睇嚟個封印陣又的確使得嘅。話時話呢，既然呢位網民個姪仔連封印柴柴嘅方法都研究到咯，咁介唔介意研究埋點樣令柴柴唔好咁懶呢？
甥っ子に封印された犬 pic.twitter.com/YZATzpOFT5
— 解散 (@yoiotto88) 2017年1月28日
