搭巴士最常見到嘅，除咗有叫你管教腸胃同口氣嘅廣告之外，就係椅背嘅塗鴉喇！可能啲衰人諗住巴士冇CCTV，司機頭頂塊鏡又照唔晒成個上層，做咩都冇人知啦，所以就會手多多喺椅背寫粗口呀、愛的宣言呀咁。算罷啦，你女神有高富帥仔仔私家車坐，唔會見到你嘅告白㗎喇，仲要麻煩到清潔工人幫你執手尾，何必呢？

平時見到巴士椅背寫咩「陳大明正PK」、「天下烏鴉一樣黑」，雖然唔係話緊自己，但都已經好影響心情、覺得篤眼篤鼻㗎啦，點知喺紐約地鐵啲人仲過份，竟然畫滿納粹標誌，仲寫埋仇恨猶太同穆斯林嘅文字，讚揚希特拉！當時車上嘅乘客見到都好唔舒服，大家都唔敢出聲，默默咁你眼望我眼……

喺呢個時候，終於有個人主動出聲問大家有冇酒精消毒液，話知道酒精可以抹走marker筆跡，之後大家都開始拎出紙巾努力抹抹抹喇。只係兩分鐘時間，車上嘅納粹標誌就全部抹走晒喇！

呢班乘客唔止有公德心，更加顯示出對世界和平嘅追求，真係好令人滾動，甚至令人重新相信人間有愛呀！多謝你哋呀！

封面圖片、資料來源連結：gregoryalocke