古乳有暈，拜得神多自有神庇佑，啱啱過完年，最好就梗係拜個神轉下運啦～啲人通常拜神都係求嚟求去咪又係身體健康、闔家平安，再唔係就早日發達、不勞而獲咁囉。其實有心願嘅又點止人類呀，狗狗都想有人幫佢夢想成真㗎！

「佛祖呀，你保佑我今年日日有肉又有骨骨食喇，我會好乖㗎汪～」

汪星人咁誠心拜你，佛祖你就幫幫忙啦好嘛？不過狗狗呀，如果主人跟佛祖食開齋又好難變嚿肉出嚟過你吃㗎啵～食素肉同齋燒鵝頂住先好冇？

「咁佛祖你保佑我追到隔籬屋阿珍喇，我唔止拜你，我趴低向你叩頭啦汪！」

狗狗你放心啦，佛祖咁慈悲為懷，相信佢都唔忍心你做隻單身狗嘅，你平身先啦～其實係人類同汪星人先要拜神求神庇佑啫～換轉係喵星人，使咩拜神呀！

因為係主子嘅心目中，佢哋就係神！神枱咪就係用嚟畀你哋啲愚蠢嘅人類供奉佢嘅地方囉～嗱嗱嗱，但係主子你坐還坐，唔好當個香爐係貓沙盆呀，如果唔係就名副其實神枱貓屎㗎喇！

封面圖片及資料來源：宗薩蔣揚欽哲粉絲、廖奕安