唔好以為秋風起先會見到阿蛇四圍蒲呀！雖然而家已經夏日熱辣辣，但話晒阿蛇喺冬天匿埋咁耐，家下暖笠笠就最啱佢哋出嚟舒展筋骨㗎喇，而且阿蛇仲隨時會喺你估唔到嘅地方畀個實派你?～

早前有台灣網民先試過揸揸下車見到阿蛇伸咗個頭出嚟say hi咋嘛。喂，乜阿蛇咁玩法呀？出事㗎嘛⋯⋯好彩最後人同蛇都平安冇事，消防員將阿蛇帶走咗，以後你有你嘅生活，我有我嘅忙碌啫。

而最近，有另一位台灣網民都遇到阿蛇，而且仲要係竹葉青蛇?⋯⋯

是咁的，話說有日呢位網民個阿嫲個看護就突然叫佢去後門幫拖啦，原來阿看護發現咗條竹葉青蛇呀，於是呢位網民就準備定架撐捉小青嘞。

大家以為呢位網民會拎個普通膠樽去捉小青？咪傻啦，普通膠樽又點捉到小青吖，呢個係雷峰塔嚟呀！吖話時話，唔知小青係咪以為自己終於搵到命中注定嘅人，所以就任由呢位網民擺佈，由得佢夾自己入個膠樽度呢？

any肥，捉完條小青之後點呢？殺咗佢又唔係，放咗佢又唔得，咁點算好呀？其他網民就叫佢睇定啲先，話唔定白素貞好快過嚟救佢喎⋯⋯

嗯嗯，好心你哋咁大個人就唔好咁多假設性幻想啦，邊得嚟咁多好似王祖賢同張曼玉咁嘅蛇妖呀？況且作為新一代法海，呢啲時候梗係⋯⋯梗係交返畀專業人士處理啦！

封面圖片及資料來源：Wei Ting、BKD／ PTT、電影《青蛇》截圖