而家啲小朋友聽到我哋話十年前香港仲未興玩FB、又未有挨豬，可能都會以為上網冇嘢好睇好玩啵，傻豬嚟嘅，嗰時又有MSN又有腥架，仲有留言畫板、靈劍江湖，都不知幾多姿多采呀！講到當年嘅上網回憶，又點少得「Charlie bit my finger」呢條片呢？

相信唔少人都睇過呢條經典外國BB片㗎喇，唔講都唔知，原來已經係十年前㗎喇！未睇過唔緊要，而家就畀你睇下！片入面嘅就係哥哥Harry同細佬Charlie喇，兩兄弟攬埋一齊坐喺梳化度，真係夠晒sweet呀！

點知細佬突然牙痕，拎起哥哥隻手指嚟咬呀，睇佢個樣又好似食得幾滋味咁啵～細佬先得嗰一歲，仲出緊牙仔，細細力咬落去應該唔係好痛啫，哥哥就開心咁話「Charlie～Charlie bit me～」，成就咗呢條BB片嘅經典對白喇！

細佬咬完兩啖放咗口之後，哥哥可能玩過翻尋味呀，又再擺隻手指入細佬個嘴仔度，點知今次細佬就出盡力咬，咬到阿哥牙痛咁聲呀！

好喇回完帶，一於睇下呢兩個咁得意嘅小朋友而家點樣啦？兩兄弟感情依然咁好，仲好靚仔啵！阿哥仲重演經典畫面，請細佬食手指，不過大家都大個仔，有少少老尷都係在所難免……

咦？點解多咗對分身嘅？！原來佢哋屋企後來仲多咗兩個新成員，就係今年9歲嘅細細佬Jasper同埋6歲嘅細細細佬Rupert喇！四兄弟都咁似樣，唔知有冇趁Jasper同Rupert 仲係BB嗰陣翻拍一次條片呢？

咁多年嚟，「Charlie bit my finger」呢條片已經有成8.5億點擊，2009年10月，仲登上咗YouTube熱門第一位，171日之後先畀Lady Gaga嘅「Bad Romance」打低，都咪話唔巴閉呀！雖然係咁，佢哋都仲係住緊同一間屋、坐緊同一張梳化、老竇都仲係做緊IT佬。

有邊個會諗到，當時3歲同1歲嘅佢哋，十年之後已經長大成13歲同11歲呢？真係估唔到，話都冇咁快就十年喇，我的春青小鳥一去不回頭……

封面圖片、資料來源連結：Metro、HDCYT／YouTube、Caters TV／YouTube