中學畢業嗰陣大家都會自己扲荷包買紀念冊寫，因為學校送畀你嗰本嘢通常得個名，張相又係全班大合照，個樣豆豉咁細粒，點睇呀！

外國高中就唔同呢，人哋本Yearbook 個個都有幅靚相，有啲仲可以喺相下面加返句抵死到肉嘅介紹嚟突出自己?～

好似呢位朋友，10個字都唔使，就總結到毒L嘅生涯，真係感受到嗰份出唔到Pool嘅淡淡哀傷⋯⋯

不過點玩都冇理由玩咁大，連狗狗幅相都放埋落去㗎？呢位同學唔通想自嘲自己係厹？

原來係因為呢一班真係有個狗同學呀！呢隻狗狗其實係一隻服務狗，而佢嘅主人就係身邊嗰位哥仔Andrew喇。Andrew有一型糖尿病，當佢血糖過高或過低都會有生命危險㗎！

咁又關呢隻可愛嘅狗狗Alpha咩事呢？唔通Alpha舔下主人就知佢血糖高定低？知就係知，不過唔係靠條脷，係靠個鼻呀！Alpha個鼻原來靈到喺主人血糖有極大變化嘅20至40分鐘之前就已經聞得到，真係同神犬拉茜有得揮呀！

呢對Double A組合喺學校出雙入對，連上堂都一齊上㗎。大家見到佢哋都不知幾開心，連校方都出返張學生證畀Alpha呀！咁拎得學生證，咁就係學生之一啦～Andrew咪膽粗粗問下學校可唔可以落埋Alpha個樣喺Yearbook上面囉。

Alpha咁乖咁可愛，校方又點捨得托手踭吖～雖然只係喺本Yearbook度放多一張相同加多個名，但係對於Alpha同Andrew就好有意義喇。Alpha同Andrew，恭喜你哋一齊畢業呀！

封面圖片及資料來源：每日郵報、t1dfighter_aj／twitter、紐約每日新聞