【這就是朋友】昆老友話囝囝受洗Party要扮嘢 點知佢真係信咗!

成日話朋友就係喺你_街嗰陣笑得最大聲然後扶起你嘅人,咁老友應該就係一開始整蠱你搞到你_街仲要影低放上FB笑9你,之後先再扶起你嘅人。冇計啦,老友嘅嘢,賤嘅程度好多時同認識嘅年日成正比㗎⋯⋯

圖片來源:Surgas/imgur

不過估唔到,外國有位仁兄為咗整蠱老友,連阿仔都畀佢擺埋上枱呀!點解呢位阿哥無啦啦會著到中古騎士咁㗎呢?是咁的,咁外國小朋友好多都會細細個受洗,仲會開Party慶祝𠻹!於是早幾個禮拜網友同死黨飲嘢嗰陣,就話同死黨講想幫個仔搞個扮嘢受洗Party嘞。

網友仲要吹到似層層咁,咁佢死黨咪吹埋一份囉,又話揀咩人物最好,過咗一排死黨仲同網友講佢搵到套好啱feel嘅衫,要問網友借道具呀!網友以為佢吹水啫,點知⋯⋯

圖片來源:Surgas/imgur

死黨真係著住呢套衫走入教堂睇網友個仔受洗呀!就算佢幾低調,佢都好似漆黑中嘅螢火蟲一樣咁鮮明同出眾,就連隔籬位女士都冇眼睇喇,你走啦,我唔想搞大件事呀。

圖片來源:Surgas/imgur

於是佢就唯有走⋯⋯去食嘢啦,你睇佢個樣幾無奈先得㗎⋯⋯網友死黨你又唔使咁Sad嘅,其實都唔係好多人望住你啫,你唔講佢哋唔覺嘅~除咗你後面金髮嗰位朋友。

圖片來源:Surgas/imgur

「你好嘢呀死仔包,下次開P你就知死!」

圖片來源:Surgas/imgur

網友死黨冷靜啲,你睇真啲先啦,You are not a窿㗎!你見唔見後面有個小天使呀?你過去同佢一齊坐,扮係天使收嗰啲兵,咁咪神不知鬼不覺囉!

圖片來源:Surgas/imgur

況且,Auntie都幾欣賞你嘅裝束吖,佢以為你係想搞啲餘興節目咋嘛!而網友唔止幫死黨影相紀錄成個過程,仲要放埋呢單嘢上網同大家開心share𠻹,嗱嗱嗱,呢啲咪正宗好朋友囉~放心啦網友,好快就輪返到你㗎喇。

 

封面圖片及資料來源:Surgas/imgur

毛記電視網站 · 版權所有 · 不得轉載 Copyright © TVMOST.COM.HK All rights reserved