唔知大家有冇幻想過「如果冇中國人嘅話，呢個世界會變成點呢」？大家冇諗過唔緊要，因為強國人唔單止諗過，而且仲已經講埋出嚟。由於時間嘅關係，毛孩已經幫各位毒者搵晒出嚟喇！

香港

早幾年，有個機場怨男一句嘢就點醒咗全香港700萬人，「要不是中國政府，你們早完蛋了！」，係喎，諗深一層，冇強國就冇東江水，冇東江水香港人一早就渴死晒啦，大家真係要飲水思源、好好感恩呀。

法國

《文匯報》喺幾年前評論法國經濟危機嚴重嗰陣話過，「如果法國冇咗『中國動力』呢間控股公司支持嘅話，就不堪承受」喎，呀，但係法國頂吓頂吓頂到而家都仲頂得住，睇嚟強國其實都仁慈！

（參考資料:文匯報）

韓國

泡菜國《數字時報》有篇《中國人的存在》嘅文章，大概係講泡菜國嘅強國留學生數目同影響，而強國網（冇玩你，個網真係叫強國網！）翻譯完之後，仲將人哋個標題改咗做「如果沒有中國，韓國靠什麼生存」。差咁遠，我諗可能係因為強國冇得用google translate啩。

（參考資料:強國網）

日本

強國嘅愛國青年報──獨家網話「沒有中國點頭，日本永遠不能入常」。咁日本永遠都唔可能成為聯合國常任理事國喇（應該係），慘慘豬～因為強國人都唔識點頭嘅，淨係識彎腰㗎咋嘛！

（參考資料:獨家網）

美國

中國研究國際政治嘅專家鮑盛剛看透世事（好似係），寫咗篇「沒有中國，美國會衰退更快」嘅評論，表示美國戰略家已經老喇，冇強國嘅話，佢哋啲經濟、工業通通都會唔掂，更加冇能力維持世界秩序喎！咁又係，比起美國嚟講，中國戰略家係後生好多嘅，都未出世！

（參考資料:共識網）

台灣

台灣大選支持親共嘅藍營輸咗，中華統一促進黨總裁張安樂就話「台灣最大問題是沒中國人了」。唔L係啩？咁台灣啲金邊個買呀？奶粉邊個食呀？台灣冇台灣人都唔是問題，冇強國人就萬萬不能呀！

（參考資料:文匯報）

英國

原來強國貴州大學校長鄭強都有勾結外國勢力㗎，佢仲明張目膽咁話，「如果沒有中國輸出學生，英國有兩成大學要倒閉」。好Man呀！

（參考資料:Now新聞）

澳洲

呢位居澳廿七年，原籍中國福建嘅地產開發商接受《星期日檔案》訪問嗰陣表示：「如果沒有中國移民，恐怕澳洲將活不下去。」原來澳洲差啲被滅國㗎喇，好在有強國人移民打7救咋！

（參考資料:《星期日檔案》-「中國式移民」 10/5/2015）

全世界

iPhone出新機，環球網就話「沒有中國人，就沒有iPhone。」咁真係要多謝13億強國同志喇，全靠你哋，我哋先有iPhone用咋！咦，咪住先，而家有強國人，毛孩更加冇iPhone喎，畀佢哋搶晒喇！

（參考資料: 環球網）