打工仔成日都覺得公司諸多限制，返工要準時又要打卡、食晏又淨係得一個鐘，病假又要假紙證明咁，但原來低處未算低，你已經好幸福㗎喇！最近喺網絡上熱傳一張「執貨員」嘅工作紀律指引，大概係話為咗提高公司嘅工作士氣同埋效率而設定嘅措施。

返工期間唔准whatsapp、傾計、潛水，就算屋企人有急事搵你，都只可以聽電話一次，人有三急要去廁所解決，上下晝各有兩次機會，夾埋唔准超過15分鐘……咩話，你女神搵你？sor9ly，放工先覆返佢啦，反正你連開message睇嘅機會都冇，一定唔會畀佢話你「已讀不回」嘅，長期雙灰剔啫最多。至於去廁所嘅問題，你冇聽過「懶人多屎尿」咩？為咗證明畀腦細睇你唔係廢青，畀佢知道你有幾能幹同幾捱得，呢啲小事，咪忍吓囉。

不過低處繼續有得再低，長沙有間公司規定員工唔准帶手機去廁所，衰咗嘅話24個鐘都唔入得廁所呀，我諗係費事大家喺裡面掛住打機機啩！

喺河南有間公司就連女員工幾時大肚都有規定?呀，最少要返夠一年都算嘞，仲要喺公司指定時間先大得肚呀，喂，呢個世界好多意外㗎嘛……（咁又係，入咗間咁嘅公司本身已經係一個意外，而你畀人炒咗又係另一個意外）

來源：紅網、台灣蘋果日報