9月3號無啦啦多咗嗰日假，係抗戰勝利70周年紀念嘛，打贏仗咁威威豬，紀念方式梗係唔止得放假咁少啦，強國仲會上映一齣電影呀，齣戲叫《開羅宣言》。

齣戲大概就係講返當陣時嘅歷史啦，不過毛毛冇乜畀心機讀書，淨係知道中國、英國、美國幾個大佬喺埃及開羅度開咗個會，講吓點樣對付小日本咁。印象中呢，好似係蔣介石代表中國去開嘅，而毛主席就喺延安點指兵兵緊，指揮緊啲兵呀！

成齣電影有4款海報，都係各國大佬嚟嘅，咁強國嘅大佬係邊個？出毛主席是常識吧！毛主席係我哋心中永遠嘅紅太陽嘛，但係一班不譜國情嘅網民竟然批評電影公司改寫歷史，唔放中華民國代表蔣介石落去，然後仲要將海報改圖，放咗金仔個樣落去！真係大不敬！全靠毛主席嘅神指揮，奮力抗戰，國民政府先至能夠抗戰成功咋！

另外仲有網民整咗個「海報生成器」，毛毛都諗住拍返個現代版《開羅(生門)宣言》！大概就係講一個入伍10年嘅兵仔故事……

來源：蘋果日報、生成器