學吳局長話齋，睇書真係好重要！日本有個阿叔都係咁諗，為咗等而家啲細路有多啲書睇，佢喺41年前就開始每個月寄買書錢去自己鄉下間小學喇！！！捐咗咁多年，由每個月2000yen變5000yen，捐到個個小學雞都知有個咁關心佢哋嘅大叔，不過就冇人知佢真正身份，因為個大叔係匿名咁捐㗎～

雖然唔知大叔係邊個，但班學生就每年都會搞個「大叔節」嚟多謝佢～

聽講大叔為咗保持神秘感，就算路過都唔會探啲學生～不過而家唔蒲頭就再冇機會嚕，因為間學校得返24個學生，下年就要摺埋喇！所以佢都現身參加最後一屆嘅「大叔節」～

睇下～佢同啲小朋友相處得幾開心！

最後，佢仲將第501筆錢交畀校長，正式結束咗41年嚟嘅付出～

嗚呀，呢個大叔真係好有愛！啲小學生都話係多得大叔，佢哋先會咁鍾意睇書，又有咁好嘅回憶......可惜喺香港，就算圖書館有幾多書都好，啲小學生都忙住操TSA冇時間睇啦......

封面圖片及資料來源：朝日新聞