2016年08月17日 星期三
【傑出Coser系列】對坂本嚟講，其實落雨又有咩好怕喎？
Cosplay嚟講，根據俄國嘅戲劇理論大師史坦尼斯拉夫司機嘅講法呢，應該係由外到內，再由內去返外嘅。即係話，一個專業嘅coser除咗要將角色嘅造型完美還原之外，神情動作都要似返你所cos嗰個角色先夠做嘅～就好似呢位cos坂本嘅後生仔咁！
omg！個樣使唔使似到咁？真係搞到毛毛差啲分唔到二次元同三次元嘅世界……不過咁，話明係cos「坂本」，淨係做托眼鏡呢啲咁作狀嘅動作係唔夠，唔成為全場焦點又點稱得上係「坂本」喎！
睇下，雖然個天落晒狗屎咁款，但呢位「坂本」依然無懼世事變改，坐定定喺空地嘅中間，充分表現咗「其實落雨又有咩好怕」嘅大無畏精神！
咁老老77，佢幾個姿勢又真係幾瀟灑幾華麗嘅，唔怪得瞬間就變成大家嘅焦點啦～
圖片及資料來源：紅藥君言
