眾所9知，毛毛不嬲都好受歡迎，fan屎遍佈全球每個角落嘅……i mean《怪獸公司》入面隻毛毛。

最近，有台灣網民就喺facebook見到一張小朋友著住毛毛衫嘅相，覺得件衫勁得意，咁咪諗住買返件畀自己嘅小朋友著囉，但當件衫送到嚟嘅時候，佢就發現毛毛個樣奇L怪怪咁喇！

ok，質地唔夠毛茸茸、對角毛啦啦變咗紫色、對眼細到好似啲女人冇戴大眼仔嗰陣咁都算，之但係你連個鼻都冇埋，搞到隻毛毛成個佛地魔咁，你叫人點收貨啫！所以呢位網民咪即刻同個客服反映囉……點知個客服竟然理直氣壯咁話毛毛本身就係咁嘅樣？

嗯，呢位客服真係當人哋未睇過《怪獸公司》同《怪獸大學》頂嘞……

btw，其實而家奇L怪怪咁嘅樣咪仲好，毛毛作為一個出色嘅驚嚇專員，用返佢原本個樣點夠做吖，梗係要進化到佛地魔咁連鼻都冇埋，咁先夠驚嚇㗎嘛！係咪呀大眼仔？

資料來源：何雙佑／爆廢公社